Qazaqstanda túrli internet platformalarda jumys isteitin taksi júrgizýshilerin áleýmettik qorǵaý máselesi qarastyrylyp jatyr. Bul týraly QR Eńbek jáne halyqty áleýmettik qorǵaý ministri Tamara Dúisenova aityp berdi, dep habarlaidy QazAqparat.
«Biz muny platforma operatorlarymen birge talqylap jatyrmyz. Resei qazirdiń ózinde taksi júrgizýshileri úshin áleýmettik aýdarym jasaityn pilottyq jobany bastady, onda platforma operatorlary jumys istep jatyr, múmkin «Iandeks» te bar shyǵar. Bul tólemder qyzmetkerlerdiń baǵdarlama operatoryna tóleitin qarajaty esebinen júrgiziledi», - dedi Tamara Dúisenova Senatta tilshilerge bergen suhbatynda.
Eńbek ministri dál osyndai baǵdarlama Koreiada jáne Qytaida júzege asyrylyp jatqanyn aitty.
«Eýropa da bul jumysty bastady, sondyqtan qazir olarmen kezdesip, osy máseleni talqylaýdy bastadyq jáne ortaq sheshimge kelgende sizderge habarlaimyz. Jalpy alǵanda, bul jumys júrgizilýi kerek, aitalyq, taksi júrgizýshisi kez kelgen ýaqytta jumyssyz qalýy múmkin, al olarǵa kim járdemaqy tóleidi? Tehnikanyń aty tehnika, únemi jol ústinde júredi, jol-kólik apatyna ushyrasa múgedek bop qalýy múmkin, olar úshin áleýmettik saqtandyrý qoryna esh aýdarym jasalmaidy. Sondyqtan operatorlarmen áleýmettik qorǵaý máselelerin talqylaýymyz kerek», - dep túsindirdi Tamara Dúisenova.
