Memleket basshysy Qasym-Jomart Toqaev Qostanai oblysyndaǵy órtti sóndirý jónindegi jedel shtab otyrysyn ótkizdi, dep habarlaidy QazAqparat.
«Qostanai oblysynda alapat órt bolyp jatyr. Bul jaǵdai turǵyndardyń ómiri men densaýlyǵyna jáne eldi mekenderge qaýip tóndiredi. Óńirdiń ekonomikasy men tabiǵatyna zor shyǵyn kelip otyr. Órt 4 aýdan aýmaǵyna jaiyldy, taǵy 5 obylsta – Aqtóbe, Túrkistan, Qaraǵandy, Shyǵys Qazaqstan, Aqmolada órt oshaqtary paida bolyp jatyr», - dedi Prezident.
Onyń aitýynsha, kúnniń ystyq bolyp, jeldiń kúsheiýi órtti odan ári órshitti.
«Máseleniń asa kúrdeli ekeni túsinikti. Sondyqtan Úkimet pen Prezident Ákimshiligine tiisti tapsyrmalar berdim. Órtti toqtatý úshin qajetti sharalar qabyldandy. Osyǵan orai, barlyq resýrsty dereý jumyldyrdyq. Qostanai oblysyna basqa aimaqtardan tehnika men qajetti mamandar ýaqytyly jetkizildi. Tótenshe jaǵdai ministrligine Ishki ister jáne Qorǵanys ministrlikteri, Ulttyq ulan kómekke keldi. Bul jumysqa Orman sharýashylyǵy men orman kúzetiniń jumysshylary jáne temirjolshylar tartyldy. Qazir tótenshe jaǵdai baqylaýǵa alyndy. Órt bolǵan aýyl turǵyndary qaýipsiz jerge kóshirildi», - dedi Memleket basshysy.
Aita keteiik, Qostanaidaǵy alapat órt úshinshi táýlikke sozyldy. Qazirgi ýaqytta jalpy aýdany 43 myń gektardan asqan tilsiz jaýdy aýyzdyqtaýǵa 2193 adam, 224 birlik tehnika, 7 áýe kemesi, 5 órt sóndirý poiyzy jumyldyryldy.
Bir mezette 3 aýmaqta tabiǵi órt sóndirilip jatyr - Qarabalyq, Uzynkól jáne Áýliekól aýdandarynda.
Prezident úilerin tastap ketýge májbúr bolǵan adamdarǵa tolyqqandy qoldaý kórsetýdiń mańyzdy ekenin atap ótti. Úkimet pen Qostanai oblysynyń ákimdigine zardap shekken turǵyndarǵa shuǵyl túrde ótemaqy tóleý máselesin qamtamasyz etý tapsyryldy.
Sonymen birge tótenshe jaǵdaidy joiýǵa atsalysqan barlyq azamattyń jasaǵan erligi úshin alǵys bildirip, olar nagradalar men syilyqtarǵa usynylatynyn aitty.
