1 tamyzdan beri taǵy 21 eldi mekennniń ákimi tikelei sailaý arqyly qyzmetke kelgen. Bul týraly QR Prezidentiniń kómekshisi Erlan Qarin Telegram-daǵy paraqshasynda jazdy, dep habarlaidy QazAqparat.
«Biyl 25 shildede elimizdiń 730 aýyldyq okrýginde alǵash ret ákimderdiń tikelei sailaýy ótken. Bul - bir rettik naýqan emes. Ákimderdiń ókiletti merzimi aiaqtalýyna qarai sailaý basqa eldi mekenderde de ótedi. Is júzinde apta saiyn Qazaqstannyń qandai da bir óńirinde aýyl turǵyndary óz ákimin sailaidy. 1 tamyzdan bastap tikelei daýys berý arqyly taǵy 21 aýyldyq okrýgtiń basshylary sailandy. Sonda búginge deiin barlyǵy 751 aýyldyq okrýgte ákim sailaýy ótken», - dep jazdy Prezidenttiń kómekshisi.
Onyń aitýyna qaraǵanda, sailanǵan ákimderdiń 86%-yn saiasi partiialar kandidat retinde usynsa, 14%-y ózin-ózi usynǵan.
«Sailanǵan ákimderdiń 50%-ǵa jýyǵy – buryn ákim laýazymynda jumys istep kórmegen jańa tulǵalar. Osylaisha, tikelei sailanbaly júieniń enýi aýyl ákimderi korpýsynyń jańarýyna septigin tigizip jatyr dep aitýǵa bolady. Jyl sońyna deiin taǵy 70-ten astam aýyldyq okrýgte ákim sailaýyn ótkizý josparlanyp otyr», - deidi Erlan Qarin.
