Qyzylordadaǵy úsh kópqabatty úidiń turǵyndary tabiǵi gazdan ajyratylǵandyqtary týraly shaǵym bildirdi. Merdiger-kompaniia ókilderiniń aitýynsha, úilerdegi tabiǵi gaz zańsyz ótkizilgen.
Esterińizge sala keteiik, Jibek joly kóshesindegi 15 páterlik úsh úidiń turǵyndary páterlerine tabiǵi gaz júrgizilgendigin habarlady, biraq kóp uzamai bul úilerde gaz berý toqtatylǵan. Kógildir otyndy zańsyz kirgizgendikteri anyqtaldy.
Gaz infraqurylymyn damytý jáne qaýipti óndiristik nysandardy memlekettik baqylaý bóliminiń bastyǵy Oljas Ismalaevtyń aitýynsha, kompaniia qyzmetkeri basshylyqtyń qoltańbasy men mórin qoldan jasaǵan.
«Patsaiy» JShS ókiliniń aitýy boiynsha, kompaniia qyzmetkeri basshynyń qoltańbasy men mórin qoldan jasap, turǵyndarmen zańsyz kelisimshart jasasqanyn moiyndap otyr. Osyǵan orai «QazTransGaz Aimaq» AQ zańsyz qosylǵan gaz qubyrlaryn turǵyn úiden ajyratqan. Qazirgi tańda zańdy túrde kógildir otynǵa qosý jumystary jedel júrgizilýde, aidyń aiaǵyna deiin bul másele retteledi»,-dedi Oljas Ismalaev.
Sonymen qatar, qyzmetker jumystan shyǵarylatynyn, turǵyndarǵa óz qarjysy esebinen shyǵyndarynyń ótemaqysyn tólep jáne bastaǵan gazdandyrý jumysyn sońyna deiin jetkizetinin málimdedi.
