Óskemen qalasynyń turǵyndary ShQO ákimi Danial Ahmetovke jańa salynǵan kópqabatty úidiń sapasyzdyǵyna shaǵymdandy, dep habarlaidy QazAqparat.
Aimaq basshysy Danial Ahmetovtiń aitýynsha, Baýyrjan Momyshuly kóshesindegi 14-shi úidi «Báiterek Development» ipotekalyq kompaniiasynyń tapsyrysymen «Garant QURYLYS» uiymy salǵan. Al qazirgi ýaqytta bul kompaniia bankrot boldy.
«Qurylys jumystarynyń sapasyzdyǵy saldarynan turǵyndar zardap shegýde. Arnaiy komissiia qazirdiń ózinde smetany qaita eseptep, sheshim shyǵardy. Barlyq kemshilikterdi joiý úshin 280 mln teńge qajet. Eger jyl sońyna deiin kompaniia ókilderi máseleni sheshpese, onda men kompaniiany sotqa berýdi tapsyrdym. Óitkeni másele zań aiasynda sheshilýi kerek. Óz tarapymyzdan kópqabatty úi turǵyndaryna kemshilikterdi joiýǵa biýdjetten qajetti somany bólip, qoldaý kórsetemiz», - dedi ol.
Turǵyndardyń basym bóligi páterdi nesiege alǵan. ShQO ákimi eki-úsh kún ishinde ipotekalyq kompaniianyń sheshimin kútetindigin jetkizdi.
«Sodan soń ary qarai qai baǵytta jumys isteý kerektigin sheshemiz. Olar shartqa qol qoiyp, jóndeý jáne qalpyna keltirý jumystaryna kepildik berýi tiis», - dedi Danial Ahmetov.
