Qazaqstan Respýblikasynyń Syrtqy ister ministri Beibit Atamqulov Ońtústik Koreianyń Prezidenti Mýn Chje Inniń elimizge jasaityn aldaǵy memlekettik saparyna bailanysty Koreia Respýblikasynyń Elshisi Kim De Sikti qabyldady. Bul týraly QR Syrtqy ister ministrliginiń baspasóz qyzmeti habarlady.
Kezdesý barysynda ministr Koreia Respýblikasy Prezidentiniń Qazaqstanǵa memlekettik sapary elderimizdiń arasyndaǵy strategiialyq seriktestiktiń ornaýynyń 10 jyldyǵy qarsańyndaǵy ekijaqty qarym-qatynastardyń mańyzdy oqiǵasy bolatyndyǵyn atap ótti.
Sonymen qatar, taraptar birqatar mańyzdy is-sharalardy, onyń ishinde QR Tuńǵysh Prezidenti - Elbasy Nursultan Nazarbaev, Qazaqstan Prezidenti Qasym-Jomart Toqaev jáne QR Premer-Ministri Asqar Maminmen kezdesýlerdi kózdeitin sapar baǵdarlamasynyń aýqymdylyǵyn atap ótti.
Qazaqstan-Koreia biznes-forýmyn uiymdastyrýyna erekshe nazar aýdarylyp, onyń sheńberinde birqatar eki jaqty kommertsiialyq qujattarǵa qol qoiý, sondai-aq ónerkásip, aýylsharýashylyq, infraqurylym, meditsina jáne tsifrlandyrý salasyndaǵy birlesken investitsiialyq jobalar men bastamalardyń kórmesin uiymdastyrý josparlanyp otyr.
Sondai-aq, ekijaqty qarym-qatynastardyń ózekti máseleleri men Korei túbegindegi jaǵdai boiynsha pikir almasty.
Qazaqstan men Koreia arasyndaǵy dástúrli dostyq qarym-qatynastardy odan ári nyǵaitýdyń ártúrli aspektilerine, onyń ishinde ózara tiimdi saýda-ekonomikalyq jáne mádeni-gýmanitarlyq bailanystardy damytý máselelerine toqtaldy.
Taraptar Qazaqstan men Ońtústik Koreia arasyndaǵy ekijaqty saýda kóleminiń ósýine erekshe kóńil bóldi, atap aitqanda taýar ainalymy 2018 jyly 3,9 mlrd. AQSh dollaryn qurady, onyń ishinde Qazaqstannan eksport 2,9 mlrd. dollarǵa, al Ońtústik Koreiadan import 922 mln. dollarǵa jetti.
2005 jyldan 2018 jylǵa deiingi kezeńde Ońtústik Koreiadan Qazaqstan ekonomikasyna tikelei sheteldik investitsiialardyń jalpy aǵyny 5 mlrd. AQSh dollaryn qurady. Búgingi kúni Qazaqstanda Ońtústik Koreia kapitaly bar 500-ge jýyq kompaniia jumys isteidi. Sońǵy jyldary Hyundai, LG, Samsung, Lotte Confectionery, SK, Dongil Highvill siiaqty kompaniialar Qazaqstanda tabysty jumys atqarýda.
