Arnanyń synǵa qalǵan "Biraq..." baǵdarlamasy jabylatyn boldy. Bul týraly Mádeniet ministri Aida Balaeva málimdedi, dep habarlaidy "Ult aqparat" Informburo.kz saityna silteme jasap.
"Habar" arnasynyń "Biraq..." atalatyn jańa tok-shoýy áleýmettik jelide kórermenniń synyna ushyrady. Alǵash bul týraly otbasylyq zorlyqtan japa shekken áielder men balalarǵa arnalǵan ortalyqtyń jetekshisi Anna Ryl habarlaǵan bolatyn.
Annanyń aitýynsha, ol arna qyzmetkerleriniń ótinishi boiynsha ortalyqtan pana izdep kelgen Gúlmira Smailovanyń bailanys derekterin usynǵan. Keiipker stýdiiaǵa onyń burynǵy kúieýi kelmeitin bolǵan jaǵdaida tikelei efirge shyǵýǵa kelisken. Alaida, arna qyzmetkerleri bul ýádesinde turmai, efirge onyń kúieýin shaqyryp, Gúlmiranyń qarsylyǵyna qaramastan, ekeýin tatýlastyrýǵa áreket etken. Sondai-aq, baǵdarlama júrgizýshisiniń orynsyz suraqtary da syn astynda qaldy. Bul jaǵdai arna kórermenderiniń ashý-yzasyn týǵyzdy.
Osy oraida "Habar" arnasynyń basqarma tóraǵasy Kemelbek Oishybaev facebook jelisinde Gúlmira Smailova men arna kórermenderinen keshirim surady.
"Biraq"-tyń shalys basqan qadamy áli túzeledi. Redaktsiiaǵa osyndai dereý qoǵamdyq talqy, qoldaý da mańyzdy. Dál búgin qatysqan keiipkerlerden de, kórermennen de suraǵan keshirimimizdi qabyl alyńyzdar. Óz aldyna qonaǵymyz bolyp kelgen Gúlmira Smailova men "Qorǵaý-Astana" krizistik ortalyǵynyń ujymynan jeke keshirim suraimyz", – dep jazdy arna basshysy.
Kemelbek Oishybaevtyń aitýynsha, "Biraq..." baǵdarlamasynyń efirge shyqqanyna 2 kún ǵana bolǵan.
Bul jaǵdaiǵa bailanysty mádeniet jáne aqparat ministri Aida Balaeva da pikir bildirdi. Ol baǵdarlamanyń jabylatynyn málimdedi.
"11 naýryzdan bastap "Habar" arnasynda otbasyndaǵy áleýmettik máselelerin kóterip, ony sheshýge baǵyttalǵan "Biraq..." baǵdarlamasynyń shyǵarylymy uiymdastyryldy. Alaida, tikelei efirdegi berilgen shyǵarylymda redaktsiia baǵdarlamanyń dittegen maqsatyna jete almai, keiipkerdi jańylystyrý arqyly qoǵamda túrli pikirler týyndatty. Memlekettik ideologiiany júrgizip otyrǵan memlekettik telearna bundai olqylyqqa jol bermeýi tiis edi. Eń aldymen, redaktsiia barlyq etikalyq normalardy saqtap, otbasylyq-turmystyq zorlyq-zombylyq pen arandatýshylyqqa jol bermeýge, keiipkerlerdi kópshilik aldynda qorlamaý qajet edi. Sondyqtan telearna redaktsiiasyna bul úlken sabaq bolady dep sanaimyz. Atalǵan tok-shoý jabylady", – dedi Aida Balaeva.
