Jambyl oblysynda poiyzdyń relsten shyǵyp ketýi saldarynan zardap shekken jolaýshynyń áieli apat kezinde vagonda ne bolǵanyn jáne kúieýi Álibi Baijanov eki aiaǵyn qalai syndyryp alǵanyn aityp berdi.
Aigúl Kárimovanyń aitýynsha, olar aýdarylǵan vagondardyń birinen eki búiir orynǵa bilet alǵan.
"Biz Astanadan Almatyǵa bara jatyr edik. 14-shi vagonda boldyq. Men búiir orynda otyrdym, kúieýim janymda otyrǵan. Uiqydan turyp, shai iship jatqanbyz. Saǵat birge taiap qalǵan ýaqyt. Bir kezde poiyz teńselip, aýdaryla bastady… Birden bir jerden ustap qalý kerek degen oi keldi. Poiyz qulap bara jatqanyn túsindim. Al kúieýim menen ustamaq boldy. Óitkeni búiir jaq bolǵandyqtan onyń qolyna eshteńe iline qoimaǵan", — dedi ol Sputnik-ke bergen suhbatynda.
Áieldiń aitýynsha, poiyz aýdarylǵannan keiin olardyń eki orny da joǵaryda qalǵan.
"Buǵan deiin kúieýim: "Myna poiyzdyń tejegishinde aqaý bar, julqyp jatyr" dep edi. Kózdi ashyp-jumǵansha qulap ketti, sózben aityp jetkizý múmkin emes", — deidi Kárimova.
Syrtqa shyǵý úshin terezeni syndyrýǵa týra kelgen.
"Shańǵyp ketti, balalar jylap jatyr – bizdiń vagonda 18 bala boldy! Qudai saqtap bári aman… Kúieýim: Aigúl, aiaǵym synyp ketti" dedi. Adamdar joǵary qarap qalǵan terezeni syndyryp, ony shyǵaryp aldy. Sodan keiin taldardyń arasyna alyp baryp jatqyzdy. "Jedel járdemdi" kúttik. Ashyq synyqtan qan ketip jatty, súiegi kórinip turdy", — deidi áiel.
Kóz jumǵan jasóspirimdi Kárimova alystan kóripti. Onyń ómirin qutqaryp qalýǵa árekettengen, alaida nátije bolmaǵan. Sonymen qatar, jolaýshynyń aitýynsha, apattan keiin jolserikterdiń birin toq urǵan. Alaida qazir onyń jaǵdaiy jaqsy eken.
Búgin Álibi Baijanovqa dárigerler ota jasaýy tiis.
"Eki aiaǵy da synyp ketti, bir aiaǵynda jabyq, ekinshisinde ashyq synyq. Dárigerler gips saldy. Kúieýim esin biledi, sóilep jatyr", — dep túiindedi ol.
Keshe Jambyl oblysy Shý aýdanynda "Astana-Almaty" jolaýshylar poiyzynyń segiz vagony relsten shyǵyp ketti. Poiyzda 829 jolaýshy kele jatqan. Apat kezinde 12 jasar jasóspirim kóz jumdy. Jambyl oblysynyń densaýlyq saqtaý basqarmasy 14 adam meditsinalyq kómekke júgingenin habarlady. Olardyń ishinde bireýi ǵana aýrýhanaǵa jatqyzylǵan.
