Synaqtan ótip jatqan qazaqstandyq vaktsinanyń nátijesi sáýir aiynda shyǵady. Bul týraly QR Densaýlyq saqtaý ministri Aleksei Tsoi «Habar» arnasyne bergen suhbatynda aitty, dep habarlaidy QazAqparat.
«Biz koronavirýsqa qarsy vaktsinalaýdy 1 aqpannan bastadyq. Osy kezde ekpe jasaityn kabinetterdi uiymdastyryp, vaktsinany durys temperatýrada saqtaý óte mańyzdy. Osy ýaqytqa deiin elimizde 59 000 adamǵa vaktsina egildi», - deidi QR Densaýlyq saqtaý ministri Aleksei Tsoi.
Onyń aitýynsha, qazirgi ýaqytta Qazaqstan vaktsinasy resmi túrde tirkelgen brendtermen de kelisimge kelip jatyr.
«Osy aida 90 myń qosymsha vaktsina jetkizildi, endi taǵy qosymsha 105 myń vaktsina óndirildi. 30 myń vaktsinany tikelei Reseiden aldyq. Budan bólek, kelesi aidan bastap 600 myń vaktsina Qaraǵandydaǵy farmatsevtikalyq zavodta óndiriletin bolady. Sáýir aiynda qazaqstandyq vaktsinaǵa qatysty nátije qalai bolatynyn kóremiz. Ol da qoldanysqa enetin bolady. Bizdiń maqsat - kúzge deiin halyqtyń basym bóligine vaktsina egilýi kerek», - deidi ol.
