Shymkent qalasynda meditsinalyq bilimi men litsenziiasy joq áieldiń zańsyz plastikalyq operatsiia jasaý faktisi boiynsha sot úkimi shyqty. 28 jastaǵy qala turǵyny blefaroplastika jasaǵannan keiin patsienttiń bir kózi tolyq kórmei qalǵan, dep habarlaidy ult.kz Hronika.kz portalyna silteme jasap.
Sot materialdaryna sáikes, aiyptalýshy meditsinalyq ortalyqtardyń birinen kabinet jaldap, áleýmettik jelilerde plastikalyq operatsiialar men tipti hirýrgiia boiynsha «oqytý kýrstaryn» jarnamalaǵan. Ol tanysyn 100 myń teńgege qabaqqa operatsiia jasatýǵa kóndirgen.
Alaida operatsiia kezinde asqynýlar týyndap, naýqastyń sol kózinde qatty qan ketý men isiný baiqalǵan. Patsient kórý qabiletinen aiyrylǵanyn aitqanymen, áiel muny qalypty jaǵdai dep túsindirgen.
Keiin kásibi dárigerler zardap shegýshige kórý júikesiniń atrofiiasy diagnozyn qoiǵan. Ýaqyt joǵaltýdyń saldarynan kózdiń kórý qabiletin qalpyna keltirý múmkin bolmaǵan.
Sotta aiyptalýshy kinásin tolyq moiyndady. Sot ony zańsyz meditsinalyq qyzmet kórsetip, densaýlyqqa aýyr ziian keltirgeni úshin kináli dep tanyp, 1 jyl 6 ai merzimge bas bostandyǵynan aiyrý jazasyn taǵaiyndady. Sondai-aq oǵan 3 jyl boiy meditsinalyq qyzmetpen ainalysýǵa tyiym salyndy.
Kámeletke tolmaǵan eki balasynyń bolýyna bailanysty jaza óteý merzimi bir jylǵa keiinge shegerildi.
Budan bólek, sottalǵan áiel jábirlenýshige:
- 5 mln teńge moraldyq ótemaqy;
- 369,6 myń teńge materialdyq shyǵyn;
- 2 mln teńge zańgerlik qyzmet shyǵynyn;
- 58,9 myń teńge jábirlenýshilerge ótemaqy qoryna tólem tóleýge mindetteldi.
Sot úkimi zańdy kúshine endi.
