شىمكەنت قالاسىندا مەديتسينالىق بٸلٸمٸ مەن ليتسەنزيياسى جوق ەيەلدٸڭ زاڭسىز پلاستيكالىق وپەراتسييا جاساۋ فاكتٸسٸ بويىنشا سوت ٷكٸمٸ شىقتى. 28 جاستاعى قالا تۇرعىنى بلەفاروپلاستيكا جاساعاننان كەيٸن پاتسيەنتتٸڭ بٸر كٶزٸ تولىق كٶرمەي قالعان, دەپ حابارلايدى ult.kz Hronika.kz پورتالىنا سٸلتەمە جاساپ.
سوت ماتەريالدارىنا سەيكەس, ايىپتالۋشى مەديتسينالىق ورتالىقتاردىڭ بٸرٸنەن كابينەت جالداپ, ەلەۋمەتتٸك جەلٸلەردە پلاستيكالىق وپەراتسييالار مەن تٸپتٸ حيرۋرگييا بويىنشا «وقىتۋ كۋرستارىن» جارنامالاعان. ول تانىسىن 100 مىڭ تەڭگەگە قاباققا وپەراتسييا جاساتۋعا كٶندٸرگەن.
الايدا وپەراتسييا كەزٸندە اسقىنۋلار تۋىنداپ, ناۋقاستىڭ سول كٶزٸندە قاتتى قان كەتۋ مەن ٸسٸنۋ بايقالعان. پاتسيەنت كٶرۋ قابٸلەتٸنەن ايىرىلعانىن ايتقانىمەن, ەيەل مۇنى قالىپتى جاعداي دەپ تٷسٸندٸرگەن.
كەيٸن كەسٸبي دەرٸگەرلەر زارداپ شەگۋشٸگە كٶرۋ جٷيكەسٸنٸڭ اتروفيياسى دياگنوزىن قويعان. ۋاقىت جوعالتۋدىڭ سالدارىنان كٶزدٸڭ كٶرۋ قابٸلەتٸن قالپىنا كەلتٸرۋ مٷمكٸن بولماعان.
سوتتا ايىپتالۋشى كٸنەسٸن تولىق مويىندادى. سوت ونى زاڭسىز مەديتسينالىق قىزمەت كٶرسەتٸپ, دەنساۋلىققا اۋىر زييان كەلتٸرگەنٸ ٷشٸن كٸنەلٸ دەپ تانىپ, 1 جىل 6 اي مەرزٸمگە باس بوستاندىعىنان ايىرۋ جازاسىن تاعايىندادى. سونداي-اق وعان 3 جىل بويى مەديتسينالىق قىزمەتپەن اينالىسۋعا تىيىم سالىندى.
كەمەلەتكە تولماعان ەكٸ بالاسىنىڭ بولۋىنا بايلانىستى جازا ٶتەۋ مەرزٸمٸ بٸر جىلعا كەيٸنگە شەگەرٸلدٸ.
بۇدان بٶلەك, سوتتالعان ەيەل جەبٸرلەنۋشٸگە:
- 5 ملن تەڭگە مورالدىق ٶتەماقى;
- 369,6 مىڭ تەڭگە ماتەريالدىق شىعىن;
- 2 ملن تەڭگە زاڭگەرلٸك قىزمەت شىعىنىن;
- 58,9 مىڭ تەڭگە جەبٸرلەنۋشٸلەرگە ٶتەماقى قورىنا تٶلەم تٶلەۋگە مٸندەتتەلدٸ.
سوت ٷكٸمٸ زاڭدى كٷشٸنە ەندٸ.
