Shymkentte Toyota jáne Lexus brendteriniń ataýyn zańsyz paidalanyp, kontrafaktilik motor maiy men súzgilerdi satqan kásipker anyqtaldy, dep habarlaidy ult.kz.
«Otyrar» telearnasynyń málimetinshe, tekserýdi Shymkent qalalyq Ádilet departamentiniń qyzmetkerleri brendterdiń resmi ókiliniń ótinishi negizinde júrgizgen. Nátijesinde mai aýystyrý beketteriniń birinen kontrafaktilik belgileri bar 615-ten astam motor maiy men súzgi tárkilendi.
Ádilet departamentiniń Ziiatkerlik menshik quqyqtary bóliminiń basshysy Muhtar Ábdezovtiń aitýynsha, kompaniia Qazaqstan aýmaǵynda temir qutydaǵy mundai motor mailaryn shyǵarmaidy jáne Lexus brendimen múlde motor maiyn óndirmeidi. Sonymen qatar tárkilengen qozǵaltqysh súzgileri de óndiristen shyǵarylǵan ónimder bolyp shyqqan.
Osyǵan bailanysty kásipkerge qatysty Ákimshilik quqyq buzýshylyq týraly kodekstiń 158-baby boiynsha ákimshilik is qozǵalyp, materialdar sotqa joldandy.
Mamandardyń aitýynsha, tárkilengen mailarǵa sapa saraptamasy júrgizilmegenimen, olardyń sapasy tómen bolýy yqtimal. Mundai ónimderdi paidalaný qozǵaltqyshtyń merziminen buryn tozýyna, mailaý júiesiniń lastanýyna, qyzyp ketýine jáne qymbat jóndeý shyǵyndaryna ákelýi múmkin.
Qazaqstan zańnamasyna sáikes, taýar belgisin quqyq iesiniń kelisiminsiz paidalanýǵa tyiym salynǵan. Mundai zań buzýshylyq úshin ákimshilik, azamattyq-quqyqtyq, al keibir jaǵdailarda qylmystyq jaýapkershilik qarastyrylǵan.
