Shymkentte jeke úiden órt shyǵyp, segiz balanyń anasy tiridei janyp ketti, dep habarlaidy ult.kz Stan.kz-ke silteme jasap.
Qaiǵyly jaǵdai qala irgesindegi Qainarbulaq shaǵyn aýdanynda bolǵan. Perzentteriniń kóz aldynda otqa oranǵan anany aman alyp qalý múmkin bolmady. Aýrýhanada ajal qushqan kelinshek kúieýimen birge úide kórpe-tósek tigip nápaqa tapqan eken.
Úi aýlasyndaǵy beinekameraǵa jazylǵan bul kadrlardy bei-jai qaraý múmkin emes. Jalyn ishinen júgirip shyqqan kelinshek denesiniń 80%-yn kúiik shalǵanyn da túsinbegen sekildi. Al dalada qalǵan kúieýi ony qutqaramyn dep jalań aiaq ot keship, áieline júgire bergenin aitady.
"Áielimdi qutqara almadym. Áielim ana jaqta júrgen ǵoi. Biz maqtamen ainalysamyz. Arpalysyp, áielimdi qutqaramyn dep otty basa berippin. Qutqara almadyq. 80% kúiip qalypty áielim", – deidi marqumnyń kúieýi Aidos Boranbaev.
Segiz balasy bar Boranbaevtar otbasy kórpe-tósek tigip, nápaqa taýyp otyrǵan. Úidiń aýlasynan tseh ashyp, jumys istegen eken. Kýágerlerdiń aitýynsha, aldymen maqta órtenip, sanaýly saǵattar ishinde baspananyń kúlli kókke ushqan.
"Estidik ta shaýyp keldik. Kelsek órtenip túk qalmaǵan myna jerde. 6-7 tonna maqta túk joq. Balalary syrtta júrip jantalasqan ǵoi. Biraq aman. Qudaiǵa shúkir. Úlken balasynyń myna jerleri kúiip ábirjip qaldy", – deidi oqiǵa kýágeri Erjan Yrysbaev.
Úi ishinde 39 jastaǵy Maral Boranbaeva qalyp qoiypty. Ony qutqarýǵa kúieýi ǵana emes tuńǵysh balasy da umtylǵan. 17 jastaǵy jigit aqyry anasyn qyzyl jalyn ishin alyp shyǵypty. Alaida aýrýhanaǵa jetken soń kelinshektiń demi úzilgen.
"Abaisyzda adam ólimine ákep soqqan qaýipsizdik talaptaryna sai kelmeitin jumystardy oryndaý ne qyzmetter kórsetý" deregi boiynsha politsiiamen qylmystyq is qozǵaldy. Qazirgi tańda keshendi tergeý áreketteri júrgizilýde. Tergep-tekserý nátijesimen protsessýaldyq sheshim qabyldanatyn bolady", – delingen Shymkent qalalyq politsiia departamentiniń habarlamasynda.
Bir sátte jan-jary, baspanasy men kásibinen aiyrylǵan Aidos Boranbaev segiz balasymen dalada qaldy. Eki aiaǵy kúiip, júre almai qalǵan er adam jergilikti bilikten kómek surap otyr.
