Shymkentte 17 jastaǵy qyzdy alyp qashty degen is boiynsha sot úkimi shyqty. Kámeletke tolmaǵan boijetkendi kúshtep alyp ketken dep tanylǵan úsh jigit 3 jylǵa bas bostandyǵynan aiyryldy, dep habarlaidy ult.kz Aikyn.kz saityna silteme jasap.
Oqiǵa byltyr qarasha aiynda bolǵan. Sot materialdarynda qyzdyń kúdiktilerdiń birimen burynnan tanys bolǵany, tipti kezdesýge shyqqany aityldy. Alaida sýdianyń sózinshe, boijetken turmysqa shyǵýǵa kelisim bermegen.
– Jábirlenýshi kólikke óz erkimen otyrǵany ras. Biraq ol sol kúni jigitpen tek kezdesýge shyqqan. Qyz alyp qashýǵa ruqsat bermegen, – dedi sýdia.
Sottalýshylar tarapy úkimmen kelispei otyr. Kináli dep tanylǵan jigittiń anasy bolǵan jaǵdaiǵa senbeitinin aityp, qyzdyń olardyń úiinde qalǵanyn jetkizdi. Onyń sózinshe, boijetkendi alyp ketýge týystary kelgen kezde de ol ketpegen.
Sottalǵandardyń biri – úsh balanyń ákesi. Onyń jubaiy da sot sheshimin ádiletsiz dep sanaidy. Olar aldaǵy ýaqytta apelliatsiialyq shaǵym túsirýge nietti.
Eske salsaq, buǵan deiin 17 jastaǵy boijetken ózin Shymkentten Saryaǵashqa kúshtep alyp ketkenin málimdegen. Sondai-aq ol kúdikti jigittiń týystary “óz erkimmen keldim” dep qolhat jazýǵa májbúrlegenin aitqan.
Qazirgi ýaqytta osy is boiynsha úsh adamǵa úkim shyqty. Al tórtinshi kúdikti áli de izdestirilip jatyr.
