Memleket basshysy Qasym-Jomart Toqaev Ǵabit Syzdyqbekovti qabyldap, megapolistiń áleýmettik-ekonomikalyq damý kórsetkishteri men Prezident tapsyrmalarynyń oryndalý barysy týraly esepti tyńdady, dep habarlaidy ult.kz.
Qala ákiminiń málimetinshe, ótken jyly Shymkenttiń óńirlik jalpy ónimi 5,7 trillion teńgege jetip, 11 paiyzǵa ósken. Osy kórsetkish boiynsha qala óńirler arasynda ekinshi orynǵa shyqqan.
Sondai-aq 2025 jyly qala ekonomikasyna 859,5 milliard teńge investitsiia tartylǵan. Onyń 72 paiyzy jeke investitsiialar esebinen qamtamasyz etilgen. Jalpy ósim kólemi 7,5 paiyzdy qurady.
Ǵabit Syzdyqbekov sońǵy úsh jylda ónerkásip salasynda quny 170 milliard teńge bolatyn 50 investitsiialyq joba iske qosylyp, nátijesinde 3,5 myńnan astam jańa jumys orny qurylǵanyn aitty.
Ákimniń aitýynsha, búginde Shymkentte belsendi kásipkerlik sýbektileriniń sany 133 myńǵa jetken. Olar óndirgen ónim kólemi 4,7 trillion teńgeni qurap, shaǵyn jáne orta biznestiń óńirlik jalpy ónimdegi úlesi 41 paiyzdan 56 paiyzǵa deiin artqan.
Biylǵy tórt aidyń qorytyndysy boiynsha da negizgi áleýmettik-ekonomikalyq kórsetkishterdiń oń dinamikasy saqtalǵan. Qysqa merzimdi ekonomikalyq indikator 10,4 paiyzǵa ósip, ásirese ónerkásip, qurylys, saýda jáne kólik salalarynda joǵary qarqyn baiqalǵan.
Kezdesý barysynda Prezidentke áleýmettik infraqurylym jobalarynyń júzege asyrylýy týraly da baiandaldy. Qazirgi ýaqytta qalada 200 oryndyq zamanaýi perinataldyq ortalyqtyń qurylysy júrip jatyr. Sonymen qatar biyl 150 orynǵa arnalǵan ońaltý ortalyǵyn paidalanýǵa berý josparlanǵan.
Budan bólek, Shymkentte 35 myń kórermenge arnalǵan jańa stadion, paralimpiadalyq jáne sýrdlimpiadalyq sport túrlerine, sondai-aq bochcha sportyna arnalǵan mamandandyrylǵan keshender salynyp jatyr.
Qala ákimi bilim berý, densaýlyq saqtaý jáne turǵyn úi-kommýnaldyq sharýashylyq salalaryna jasandy intellekt tehnologiialaryn engizý jumystary júrgizilip jatqanyn da atap ótti.
Kezdesý qorytyndysynda Memleket basshysy Shymkent qalasyn odan ári damytý, investitsiia tartý jáne turǵyndardyń ómir súrý sapasyn jaqsartý baǵytynda birqatar naqty tapsyrma berdi.
