QR Sybailas jemqorlyqqa qarsy kúres agenttigi tóraǵasynyń orynbasary Shyńǵys Qabdýla elordalyq sheneýnikterdiń sybailas jemqorlyq táýekelderin anyqtaý jumystaryn synǵa aldy, dep habarlaidy QazAqparat.
«Memleket basshysy aityp ótkendei, «Memlekettik organdar bastama tanytpaidy, jaýapkershilikten taiqaqtap, qaǵazbastylyqqa salady». Jemqorlyqtyń jolyn kespei, onymen kúres tiimsiz», - dedi Sh. Qabdýla elordadaǵy memlekettik organdardyń sybailas jemqorlyqpen kúres saiasatyn júzege asyrý máselelerine arnalǵan jiyn barysynda.
Onyń aitýynsha, memlekettik organ basshylarynyń jemqorlyqqa qarsy kúres jumystary kópshilikke kórinbeidi.
«Bizdiń agenttikke Memleket basshysyn belsendi emes jáne jemqorlyqpen kúreste naqty bastamasy joq basshylar týraly aqparattandyrý tapsyrmasy berildi. Bul barlyq memlekettik qyzmetshiler úshin dabyl. Iaǵni, barlyq memlekettik organdar men árbir memlekettik qyzmetshi jemqorlyqpen teńdei kúresýi kerek», - dedi ol.
Agenttiktiń tóraǵa orynbasarynyń málimdeýinshe, memlekettik organdardyń ókilderi jemqorlyq táýekelderin ishinara anyqtaýy tiis.
«Aiaqtalmaǵan isti anyqtaý tek agenttiktiń quzyretine ǵana jatpaidy. Jemqorlyqtyń aldyn alý jumystaryn ózderińiz júrgizip, qyzmetkerlerge zardabyn tigizbei, táýekeldiń aldyn alýǵa qatysty ońtaily sheshim qabyldaýlaryńyz kerek. Bul jumysty qazirden qolǵa alý qajet. Biylǵy jyldyń 8 aiy ótti, al sybailas jemqorlyq táýekelderin taldaý jumystaryn qalalyq ákimdikke qarasty tek qana 5 basqarma júrgizgen. Qalǵandaryna bul jumys kerek emes sekildi», - dedi Sh. Qabdýla.
