Sybailas jemqorlyqqa qarsy is-qimyl agenttiginiń Seriktestik departamentiniń direktory Rasýl Medetov jemqorlyq týraly aqparat bergen adamǵa beriletin syiaqy mólsheri qalai óskenin aityp berdi, dep habarlaidy QazAqpara.
«Biyldan bastap sybailas jemqorlyq boiynsha aqparat bergen adamdarǵa syiaqy mólsheri óskenin atap ótkim keledi. Buryn eń maksimaldy kórsetkishi – 250 myń teńge bolsa, qazirgi tańda habar bergen adam 10 mln 600 myń teńgege deiin syiaqy ala alady. Árine ol fakt biraq dáleldenip, sot úkimi shyǵýy kerek», - dedi Rasýl Medetov agenttiktiń Facebook paraqshasyndaǵy suhbatta sóilegen sózinde.
Eske sala ketsek buǵan deiin Rasýl Medetov jemqorlyq týraly habar bergen adamnyń aqparaty shynaiy bolýy kerektigin málim etken edi.
«Qazaq «aýrýyn jasyrǵan óledi» deidi. Sondyqtan árine belgili bir jerde paraqorlyq faktisi tirkeletin bolsa ol jaily habarlaý – bizdiń mindetimiz, azamat retinde paryzymyz. Biraq bul rette bir máselege nazar aýdartqym keledi. Ózim de óńirlerde jumys istedim. Azamattardyń keibiri anaý jerde mynadai, mynaý jerde anadai paraqorlyq bolyp jatyr dep negizsiz ári dáleldenbegen aqparat berip jatady. «Qymbat kóligi bar, demek para alady» eken degen osyndai alypqashpa sózder shyndyqqa janaspaýy da múmkin. Sondyqtan kelip túsken aqparat mindetti túrde shyn bolýy kerek», - dedi Rasýl Medetov agenttiktiń Facebook paraqshasyndaǵy suhbatta sóilegen sózinde.
