Jyl sońyna deiin suiytylǵan gaz baǵasy qymbattaýy múmkin. Bul týraly Májiliste ótken Úkimet saǵatynan keiin BAQ ókilderine bergen suhbatynda Energetika ministri Bolat Aqsholaqov málimdedi, dep habarlaidy Ulysmedia.kz.
«Tabiǵi gazdyń baǵasyn birlesken buiryqpen bekitkenimizdi bilesizder. Ortasha deńgeide 8 paiyz ósedi. Al, suiytylǵan gazǵa kelsek, jyl sońyna deiin zańdy túrde bekitýge múmkindik joq. Biz ony baqylaýǵa alýdy maqsat etip otyrmyz. Úkimet bizdiń ministrlikke, Básekelestikti qorǵaý jáne damytý agenttigine, Ulttyq ekonomika ministrligine osyndai mindet júktep otyr», - dedi Aqsholaqov.
Vedomstvo basshysynyń sózinshe, bul máselede gaz óndirip otyrǵan zaýyttardyń da jaǵdaiy eskerilýi kerek.
«Qazir suiytylǵan gazdyń ortasha baǵasy bir tonnasyna 28 myń teńge. Bul, árine, ózindik qunyn aqtamaidy. Bekitilgen baǵa 28 myń teńge bolsa, ózindik quny 60-90 myń teńgeniń arasynda qubylady, ár zaýytta árqalai. Sondyqtan biz ony shamamen kóterýimiz kerek. Kelesi 180 kúndikke suiytylǵan gazdyń baǵasy sál ósýi múmkin. Ol 20 paiyzdan artyq emes. Mysaly, qazir bir tonnasy 28 myń teńge bolsa, 36 myń teńge bolady. Basqasha aitqanda, kóterme baǵa 1 litrge 27 teńgeden bolsa, 29 teńge bolady. Janarmai quiý stansalaryndaǵy baǵany búkil quziretti organdar baqylaýyna alady. Baǵany negizsiz kóterýge jol berilmeidi. Ondai faktiler boiynsha tiisti sharalar qoldanylady», - dedi ministr.
