Nadiia Qazaqstanǵa 2020 jyldyń kúzinde kóship kelgen. Ortaq tanystary arqyly bolashaq jubaiy - Qazaqstan azamatymen Ýkrainaǵa kelgende tanysqan. Artynsha, olar Almatyǵa tolyq kósher aldynda birneshe ret elge kelgen.
"Kósher aldynda men úshin qiyny ata-anamnan jyraq ketý bolǵan shyǵar. Men otbasymdaǵy jalǵyz balamyn, ata-anamdy jalǵyz qaldyrǵym kelmedi. Biraq degenmen mahabbat bolǵandyqtan ketý kerek boldy. Mádeni ózgeriske bailanysty asa alańdamadym, sebebi bul jerde kóbi orys tilinde sóileitinin bildim, týǵan tilim ýkrain tili bolǵanymen túsinetinimdi bildim. Alaida belgili bir ortaǵa túskendikten qazaq tilin úirengim keletinin túsindim", - deidi Nadiia.
Onyń sózinshe, Almatyǵa kelgende kórip, tańǵalǵany - taýlar. Bastapqyda qatty tańǵalǵan. Ol ósken jerinde - Ýkrainanyń batysynda taýlar baryn, alaida olar mundai emes ekenin aitady. Qazaqstandyqtarmen aralasýda eshqandai problema bolmaǵan, sebebi adamdar óte meiirimdi kóringen.
Nadiia jańa sózdermen tanysa kele buǵan deiin belgili sózderge uqsastary baryn atap ótti. Onyń sózinshe, "sirińke" sózi ýkrain tilindegi "sirniki" sózine uqsas.
"Qazaq tilinde maǵan qatty unaǵany - "janym" sózi. Sebebi ol meniń janym dep názik estiledi. Taǵy bir súiikti sózim - "táte". Sizderde kóbine beitanys áielderge aityp jatady, al bizde olai emes", - deidi TikTok bloger.
Jergilikti ashanadan ýkrainalyqqa unaǵany - jylqynyń etinen jasalatyn taǵamdar. Nadiianyń sózinshe, bastapqyda "jylqyny jeý aianyshty" bolǵan. Alaida bir kúni jylqynyń etin baiqamai jep qoiǵan, degenmen onyń dámi Nadiiaǵa unaǵan.
