Qant diabeti aýrýyna qarsy kúres kúnin búginde álemniń 160 memleketi atap ótedi. Dúnie júziniń jurtshylyǵy bul kúndi jyl saiyn 14 qarashada atap ótýdi dástúrge ainaldyrǵan.
Qant diabeti – keń taraǵan qaýipti aýrý. Ókinishke qarai, jazylmas dertke shaldyqqandar sany jyl ótken saiyn kóbeiýde. Búginde densaýlyqty saqtaýdyń, kez kelgen keseldiń aldyn alýdyń eń tiimdi joly skrining ekenin kóp jylǵy tájiribe dáleldep otyr. Osy arqyly keń taraǵan aýrý túrlerin erterek anyqtap, utymdy emdeý isi júrgizilýde. Densaýlyq» baǵdarlamasy aiasynda ótkizilip jatqan tegin skrining jumystary barysynda naýqastar anyqtalýda. Aita keterligi, 40 pen 70 jas shamasyndaǵy turǵyndar ózderi tirkelgen emhanalarda skriningten aqysyz óte alady.
Sýsamyr – óte kúrdeli jáne qaterli aýrý. Dárigerler 40 jastan asqan, dene salmaǵy aýyr jáne gipertoniiaǵa shaldyqqan jandarǵa qant diabetine udaiy tekserilip otyrý keregin eskertedi. Derttiń bul túri tuqym qýalaidy. Bul aýrýǵa qandaǵy qant deńgeiiniń kóterilýi sebep bolady. Onyń sońy asqazan asty bezi shyǵaratyn gormon-insýlinniń tapshylyǵyn týyndatady. Sonyń saldary aǵzadaǵy zat almasýdyń buzylýyna ákeledi. Qant diabetiniń II tipi tabletkamen emdelse, I tipi tek insýlinge táýeldi etedi.
Túrkistan oblysynda sońǵy 10 aidyń ishinde 2,5 myń adamnan qant diabeti anyqtalǵan. Al, Túrkistan oblysy boiynsha barlyǵy 23 myńǵa jýyq adam qant diabeti dertine shaldyqqan. Sýsamyrmen aýyratyndardyń 93%-y 40-80 jas shamasyndaǵy azamattar eken.
Osyǵan orai, oblystyq densaýlyq saqtaý basqarmasynyń uiymdastyrýymen Túrkistan qalalyq ortalyq emhanasynda «Ashyq esik» kúni uiymdastyryldy. Sýsamyr dertimen kúres aiasynda naýqastar tájiribeli endokrinolog mamandardan keńes aldy. Kóptegen turǵyndar qandaǵy qant deńgeiin anyqtaý úshin taldama jasatty.
Serikqali Jeksenbaev,
"Ońtústik Qazaqstan" gazeti
