Astana qalasynyń mamandandyrylǵan aýdanaralyq ákimshilik soty QR Mádeniet jáne sport ministrligi men 2022 jylǵy Sýrdlimpiada chempiony Erkebulan Qanafin arasyndaǵy daýǵa qatysty sheshim shyǵardy, dep habarlaidy QazAqparat.

QR Ulttyq sýrdlimpiada komitetiniń málimetinshe, sot QR Ákimshilik rásimdik-protsestik kodeksiniń 151-152, 154-155 baptaryn basshylyqqa ala otyryp, ótken oiyndarda altyn medal jeńip alǵan Qanafinge aqshalai yntalandyrý tólemin tóleýden bas tartý zańsyz sheshim dep tanyǵan.

«Qazaqstan Respýblikasynyń Mádeniet jáne sport ministrligi» memlekettik mekemesiniń Qanafin Erkebulan Qairatulyna aqshalai yntalandyrý tólemin tóleýden bas tartý áreketi zańsyz dep tanylsyn. «Qazaqstan Respýblikasynyń Mádeniet jáne sport ministrligi» memlekettik mekemesi 2020 jylǵy 27 naýryzdaǵy Qazaqstan Respýblikasy Úkimetiniń qaýlysymen bekitilgen mólsherdegi aqshalai yntalandyrý tólemin Erkebulan Qairatuly Qanafinge tóleýge mindettelsin», - delingen mamandandyrylǵan aýdanaralyq ákimshilik sot sheshiminde.

Eske salaiyq, Erkebulan Qanafin 5 mamyrda Braziliiada ótken Sýrdlimpiada oiyndaryndaǵy dziýdo básekesinde 81 kelige deiingi salmaq sanatynda altyn medal jeńip alǵan bolatyn.

Alaida elimizdiń Mádeniet jáne sport ministrligi Ulttyq sýrdlimpiada komiteti Qanafindi óz esebinen jarysqa jiberip, Qazaqstannyń bedeline álemdik sport qoǵamdastyǵynyń aldynda nuqsan keltirdi jáne sporttyq etikalyq qaǵidalardy buzdy dep málimdegen edi.