Sport salasyndaǵy basshylar 2024 jylǵy Olimpiadaǵa daiyndyq máselelerin talqylady, - dep habarlaidy Tengrinews.kz tilshisi Mádeniet jáne sport ministrligine silteme jasap.
Mádeniet jáne sport ministri Dáýren Abaev olimpiadaǵa qatysýǵa múmkindik beretin litsenziialar sanyna emes, medaldardyń sapasyna nazar aýdarý qajet ekenin aitty.
"Joǵary jetistikter sportyn damytý úshin úlken qarajat bólinip, qoldaý kórsetilip, qajetti jaǵdailar jasalyp jatyr. Degenmen, ministrlik qaiyrymdylyqpen ainalyspaidy. Sondyqtan ár teńge úshin suraýy qatty bolady. Muny osynda otyrǵan árqaisysyńyz este saqtaýǵa tiissizder. Joǵary jetistikter sporty naqty nátijelerge negizdeledi, qalǵany - dene shynyqtyrý. Sondyqtan bizge jańa jeńister kerek", - dedi Dáýren Abaev.
Ministr irikteý protsedýralarynyń ashyqtyǵyna erekshe kóńil bólinetinin atap ótti.
"Qurama komanda qataryna sportshylardy irikteý rásimderiniń ashyq ótýi mańyzdy. Bul bizdiń basty nazarymyzda bolady. Aldaǵy ýaqytta ministrlik sportshylardyń barlyq jetistikterin, jarystarǵa qatysý kestesin baqylaýǵa múmkindik beretin e-sport júiesin iske qosady. Ádilettilik pen ashyqtyq mańyzdy, sport júiesinde salaýatty básekelestik bolýy tiis", - dedi Dáýren Abaev.
Ministr sport basqarmalarynyń basshylaryna olimpiadalyq sport túrleriniń basymdylyǵyn eskere otyryp, joǵary sport sheberligi mektepteriniń jumys isteý qaǵidattary men tásilderin qaita qaraý, federatsiialarmen birlesip sport rezervin daiyndaýdyń biryńǵai standartyn jáne oqytý baǵdarlamalaryn ázirleýdi tapsyryldy.
