Tanymal opera ánshisi, «Astana Operanyń» jetekshi solisi, Qazaqstannyń eńbek sińirgen qairatkeri, «Qurmet» ordeniniń kavaleri Súndet Baiǵojin Djýzeppe Verdidiń áigili «Traviata» operasynda Jorj Jermon partiiasynda debiýt jasaidy. Álemdik klassika jaýhary teatrdyń Úlken zalynda 17 aqpan kúni kórermen nazaryna usynylady.
Ataqty qazaqstandyq bariton Súndet Baiǵojin Otanynda ǵana emes, sondai-aq shetelde de erekshe talap etiledi. Onyń aýqymdy repertýarynda ulttyq jáne álemdik klassikanyń operalyq qoiylymdaryndaǵy jetekshi partiialar bar: Abai («Abai», A.Jubanov pen L.Hamidi), Bekejan («Qyz Jibek», E.Brýsilovskii), Marsel («Bogema», Dj.Pýchchini), Sharples («Madam Batterfliai», Dj.Pýchchini), Figaro («Sevildik shashtaraz», Dj.Rossini), Eskamilo («Karmen», J.Bize), Onegin («Evgenii Onegin», P.Chaikovskii) jáne t.b. Ártis AQSh, Italiia, Frantsiia, Avstriia, Resei, Belarýs, Ońtústik Koreia, Túrkiia, Iordaniia jáne ózge elderdiń bedeldi sahnalarynda úlken jetistikpen óner kórsetýde.
«Traviata» operasynda vokalist mártebeli otbasynyń qurmetti otaǵasy, baisaldy, ziialy qaýymnyń qadirli ókili Jorj Jermonnyń beinesin somdaidy. Súiýshi ári adal áke minezi Jermonnyń áýezdi ariiasy kezinde erekshe tebirenispen ashyla bastaidy. Al keiipkerdiń Violettamen keń óristegen dýetinde rýhani jekpe-jek syndy qos myqty minezdiń aiqasy oryn alady, osy kezde Jermon onyń keremet sanaly qasietterin ańǵarady.
- Osy bir qyzyqty ári mýzykalyq turǵydan kúrdeli partiiany oryndaý jumsaq dybystalýdy, «belkanto» úlgisindegi án aitý tehnikasyn igerýdi talap etedi. Jermon róli birshama «jas ereksheligine» bailanysty bolǵandyqtan, kóptegen jyldar boiy osy qoiylymda óner kórsetpedim. Jorj Jermon beinesindegi debiýtim ózimniń týǵan «Astana Opera» teatrynyń sahnasynda oryn alatyny men úshin airyqsha mańyzdy, - dep atap ótti Qazaqstannyń eńbek sińirgen qairatkeri Súndet Baiǵojin.
Súndet Baiǵojinmen birge osy keshte sahna tórine onyń áriptesteri – «Astana Opera» teatrynyń jetekshi solisteri shyǵady. Kórikti Violetta Valeri rólinde Bashqurtstannyń eńbek sińirgen ártisi Alfiia Karimova, onyń súiiktisi Alfred Jermon partiiasynda Qazaqstannyń eńbek sińirgen qairatkeri Medet Shotabaev óner kórsetedi.
«Astana Opera» simfoniialyq orkestri men hory, dirijer – Qazaqstannyń eńbek sińirgen qairatkeri Abzal Muhitdinov, bas hormeister – Qazaqstannyń eńbek sińirgen qairatkeri Erjan Dáýitov.
Franchesko Mariia Piave librettosynyń negizine Aleksandr Diýmanyń (kishi) «Kameliia ustaǵan hanym» romany alynǵan. Qoiýshy rejisser - Henning Brokgaýz (Italiia). Rejisser – Natalia Kagadii.
Spektakldiń bastalýy saǵat 18.00-de.
