Sýmma Chakrabarti Memleket basshysy Qasym-Jomart Toqaevtyń shtattan tys keńesshisi bolyp taǵaiyndaldy, - dep habarlaidy "Ult aqparat" Aqorda saityna silteme jasap.
"Memleket Basshysynyń ókimimen Ser Sýmma Chakrabarti (Sir Suma Chakrabarti) Qazaqstan Respýblikasy Prezidentiniń ekonomikalyq damý jónindegi shtattan tys keńesshisi bolyp taǵaiyndaldy", - delingen habarlamada.
Buǵan deiin bul qyzmette qazaqstandyq ekonomist Oljas Qudaibergenov jumys istegen edi.
Sýmma Chakrabati 1959 jyly Jalpaigýride (Úndistan, Batys Bengaliia shtatynda) dúniege kelgen. Onyń balalyq shaǵy Kalkýtta shtatynyń astanasynda ótti. Anasy mektepte muǵalim bolsa, ákesi tarihty zerttegen (keiin Kalkýtta ýniversitetiniń prezidenttik kolledjiniń professory bolǵan).
1964 jyly ákesi Dostastyq stipendiiasyn alyp, Oksford ýniversiteti janyndaǵy áýlie Antonio kolledjinde oqýyn jalǵastyrdy. Ulybritaniiaǵa otbasymen kóship barǵan.
1969 jyly Chakrabarti Kalkýttaǵa oraldy, biraq kóp uzamai Sýmma jáne onyń anasy Batys Bengaliiadaǵy maoizm toptarynyń (naksalitterdiń) kóterilisine bailanysty Úndistannan ketýge májbúr boldy. Osylaisha olar qaitadan Ulybritaniiaǵa baryp, Sýmma Chakrabarti sol eldiń azamattyǵyn alǵan.
Ol Oksfordtyń Jańa kolledjin bitirip (saiasattaný, filosofiia jáne ekonomika boiynsha oqydy), Sasseks ýniversitetinde ekonomikalyq damý magistri dárejesin aldy.
Damýshy naryqtarǵa mamandanǵan, memlekettik qyzmettegi aýqymdy reformalardy damytýda tájiribesi bar, britandyq «noý-haý» qoryn (1990 jj. basynda qurylǵan) - Ortalyq jáne Shyǵys Eýropaǵa tehnikalyq kómek kórsetý baǵdarlamasyn qurýda sheshýshi ról atqardy. Osy jyldar ishinde ol ekonomikasy túbegeili qaita qurý kezeńinen ótip jatqan memleketter - Shyǵys Eýropa, Taiaý Shyǵys jáne Soltústik Afrika, sondai-aq SSSR ydyraǵannan keiin paida bolǵan elder basshylyǵynyń ókilderimen yntymaqtastyqta boldy.
Ol Eýropalyq Komissiiamen Taiaý Shyǵys jáne Soltústik Afrika memleketterine arnalǵan baǵdarlamalar jasaý kezinde ózara bailanysta bolǵan. Afrikada, atap aitqanda Botsvanada jumys istedi.
1984 jyly Afrika men Ońtústik Aziia problemalarymen ainalysatyn Halyqaralyq damý jónindegi basqarma (qazirgi Ulybritaniianyń Halyqaralyq damý departamenti) qyzmetine shaqyryldy. 1988 jyly Vashingtonǵa ketip, eki jyl boiy Dúniejúzilik bankte Ulybritaniiadan atqarýshy direktordyń keńesshisi boldy. Sodan keiin ol Ulybritaniiaǵa oralyp, Halyqaralyq damý ministriniń jeke hatshysy boldy.
1996-1998 jj. Qarjy ministrliginiń birneshe departamentin, onyń ishinde biýdjet saiasaty bólimin basqardy. Memlekettik qarajattyń jumsalýyna aýdit júrgizdi.
1998-2000 jj. ol ministrler kabineti apparatyndaǵy tiimdilik jáne innovatsiia bóliminiń bastyǵy boldy. Onyń bastamasymen pánaralyq jáne vedomstvoaralyq máselelerdi sheshý úshin memlekettik taldaý ortalyǵy quryldy. Sodan keiin eki jyl boiy Ministrler kabineti janyndaǵy ekonomikalyq jáne ishki ister hatshylyǵyn basqardy. Osy kezeńde ol premer-ministr Toni Blermen tyǵyz jumys istedi. 2002-2007 jj. ol Halyqaralyq damý ministrliginde turaqty hatshy (memlekettik joǵary laýazymdardyń biri) boldy, sodan keiin 2012 jylǵa deiin Ádilet ministrliginde osyndai qyzmet atqardy. Osy kezeńdegi onyń basty jetistikteriniń biri - ministrliktiń jumys isteýiniń jańa modelin jasaý jáne engizý. Sonyń arqasynda 1 milliard fýnttan astam sterling únemdeldi.
2012 jyly ol Eýropalyq qaita qurý jáne damý bankiniń (EQDB) prezidenti bolyp sailandy. Osy laýazymdaǵy jetistikterdiń arasynda ol óziniń qyzmetiniń keńeiýin ataidy. Naqty jobalarǵa qarjy salýdan basqa, bank elderge ekonomikalyq turaqtylyqty arttyrýǵa jáne álemdik jáne aimaqtyq ekonomikaǵa integratsiiany tereńdetýge, sondai-aq jalpy álemdik syn-qaterlerge qarsy turýǵa kómektesti. 2016 jylǵy 11 mamyrda ekinshi merzimge qaita sailandy. Laýazymyn 2020 jyldyń 2 shildesine deiin atqardy.
Marapattardyń qatarynda «Ulttyń damýyna qosqan erekshe úlesi úshin» (eń joǵary - rytsarlyq dárejege ie) el azamattaryna beriletin Britan imperiiasynyń ordeni bar.
Chakrabarti - Sasseks jáne Shyǵys Angliia ýniversitetteriniń jáne Býharest ekonomikalyq zertteýler akademiiasynyń qurmetti doktory.
Ol bengal, frantsýz jáne nemis tilderin biledi.
Úilengen, áieli - Mari Sako ulty japon, Oksfordtaǵy Saïd biznes mektebinde menedjmentten sabaq beredi. Otbasynda bir qyz bar.
Hobbii - kitap oqý, ásirese úndi ádebietin jaqsy kóredi. Sondai-aq, ol - Koroldik óner qoǵamynyń múshesi.
