Sý resýrstaryna jáne sýmen qamtamasyz etýdiń búkil infraqurylymyna tolyq aýdit júrgizý qajet. Bul týraly QR Parlamenti Senaty tóraǵasynyń orynbasary Asqar Shákirov aitty, dep habarlaidy QazAqparat tilshisi.
«Búgingi Úkimet saǵatynyń taqyryby - ár qazaqstandyq úshin asa mańyzdy jáne ulttyq qaýipsizdiktiń ajyramas bóligi sanalady. Adamdardyń ómir súrý sapasy men sý ekologiialyq júieleriniń saqtalýy sapaly aýyz sýdyń qoljetimdiligine, gidroqurylystardyń jai-kúiine, sý resýrstaryn utymdy paidalanýǵa tikelei bailanysty. Osy jyldyń aqpan aiynda Prezident Qasym-Jomart Toqaev Ekologiia, geologiia jáne tabiǵi resýrstar ministrligine «sý resýrstaryn basqarý jónindegi tiisti baǵdarlamalardy ázirleý kezinde eldiń sý qaýipsizdiginiń barlyq aspektilerin muqiiat taldaýdy» tapsyrdy. Qazirgi ýaqytta jańa ekologiialyq kodekstiń jobasy QR Parlamenti Májilisiniń qaraýynda jatyr. Memleket basshysynyń atalǵan tapsyrmasy osy qujatta tiisti kórinis tapty dep úmittenemiz», - dedi Asqar Shákirov «Qazaqstannyń sý qaýipsizdigi: qazirgi kezdegi qaýip-qaterler jáne olardy sheshý perspektivalary» taqyrybyna arnalǵan Úkimet saǵatynda.
Onyń atap ótýinshe, Qazaqstan sý tapshylyǵy bar memleketterdiń qataryna kiredi. Sý resýrstaryna qajettiliktiń ósýine bailanysty sýmen qamtamasyz etýdiń jyl sanap tómendeýi baiqalady.
«Esterińizde bolsa, bul máselelerdi biz ótken jyly parlamenttik tyńdaýda jan-jaqty talqyladyq. Eske sala keteiin, ol kezde sý qorlarynyń sarqylýy men lastanýy, transshekaralyq gidrologiialyq qaýipter, aýyz sýmen qamtamasyz etý, sý infraqurylymynyń tozýy, sý resýrstaryn basqarýdyń jetilmegendigi, sý sharýashylyǵy úshin kadrlardyń jetispeýshiligi týraly aitqan edik», - dedi ol.
Senat tóraǵasy orynbasarynyń aitýynsha, Táýelsizdik jyldary sý máselelerin sheshýge tek baǵdarlamalyq qujattar aiasynda 790 mlrd teńgege jýyq memlekettik qarajat bólingen.
«Alaida, kórip otyrǵanymyzdai, aýyz sý jónindegi baǵdarlamalar aitarlyqtai nátijelerdi bermedi. Ortalyqtandyrylǵan sýmen jabdyqtaý kózderinen aýyz sýmen qamtamasyz etý kórsetkishi Qazaqstan boiynsha 77 paiyzdy qurady. Transshekaralyq sýdy paidalaný máseleleri bizdiń elimiz úshin asa ózekti bolyp qalýda. Búginde sý resýrstarynyń tek 56 paiyzy Qazaqstanda, al 44 paiyzy Qytaimen, Reseimen, Qyrǵyzstanmen jáne Ózbekstanmen transshekaralyq ózender esebinen qalyptasatyny belgili. Bul saladaǵy halyqaralyq-quqyqtyq negiz qazirgi zaman shyndyǵyn eskere otyryp, odan ári ózektendirýdi talap etedi», - dedi Senat spikeriniń orynbasary.
Sonymen qatar ol Qytaimen ortadaǵy problemalar Ile jáne Ertis ózenderi boiynsha aǵynnyń aitarlyqtai qysqarýy Balqash kóliniń sý deńgeiine jáne el indýstriiasynyń negizin quraityn iri ónerkásiptik obektilerdiń jumysyna qaýip tóndiretindigin basa aitty.
«Jekelegen máseleler sýarmaly kezeńde agrarlyq sektordyń jumys isteýi Ózbekstanmen jáne Qyrǵyzstanmen memleketaralyq ýaǵdalastyqtardyń jobalaryna qatysty bolyp otyr. Sý sharýashylyǵy obektileri men qurylystaryn tolyq aýqymdy pasporttaýdy júrgizý, olardyń tehnikalyq jai-kúiin esepke alý erekshe nazar aýdarýdy talap etedi. Sý resýrstaryna, irrigatsiialyq júielerge jáne sýmen qamtamasyz etýdiń barlyq infraqurylymyna tolyq aýdit júrgizý qajet», - dedi Asqar Shákirov.
