Jýyrda 15-19 maýsym kúnderi Oral qalasyndaǵy «Atameken» óner ordasynda QR Mádeniet jáne sport ministrliginiń qoldaýymen «Sulýlyq álemdi qutqarady» degen ataýmen halyqaralyq simpoziým ótti. Simpoziýmnyń maqsaty – halyqaralyq dárejedegi sýretshilermen tyǵyz bailanys ornatyp, elimizdiń mádeni keńistigin keńeitý, qazaq eliniń mádenieti men ónerin sýretshilerdiń qylqalamy arqyly jetkizý boldy.
Frantsýz jazýshysy Fransýa Mariarýe Volterdiń «Sýret – mylqaý poeziia, al poeziia – sóileitin sýret» deitin áigili sózi bar. Demek, bul támsil bizge kez kelgen ónerdiń túbi bir, rýhy úndes ekenin dáleldei túsedi. Al bizdiń elde ónerimen dúiim jurtty eleń etkizip, sonaý muhittyń arǵy jaǵyna deiin jetken talantty jandar jeterlik. Solardyń biri hám biregeii – sýretshi, Qazaqstan men Reseidegi Sýretshiler Odaǵynyń múshesi, batik ónerin nasihattaýshy Kamila Japalova.
Oral qalasynda ótken simpoziýmnyń da uiymdastyrýshysy, «Batik Kami» mádeni qorynyń direktory – esim-soiy talai shyǵarmashyl ortanyń aýzynda júrgen Kamila Ábenqyzy. Onyń bastaýymen ótken keshegi joba aiasynda Ázirbaijan, Ózbekstan, Túrkiia, Túrikmenstan, Qyrǵyzstan, Tájikstan jáne elimizdiń ózge de qylqalam sheberleri Jaiyqtyń jaǵasynda bas qosyp, sheberlik saǵatyn ótkizdi. Jalpy osy oraida QR Mádeniet jáne sport ministrligi atalmysh is-sharany barynsha qoldap, oǵan tipti QR mádeniet jáne sport vitse-ministri Nurǵisa Dáýeshov te qatysqanyn atap ótken jón. Shyndap kelgende, ministrliktiń osyndai igi bastamalardy qoldap, mádeniet pen rýhaniiatqa oń kózqaras tanytýy – kóńil quptarlyq is. Sebebi joba aiasynda kóptegen otandyq jáne sheteldik sýretshiler bir-birimen tájiribe almasyp, mádeni saladaǵy biligimen bólisti.
- Mundai is-sharalar el órkenietiniń damýyna óz septigin tigizedi. Sýretshiler, shyǵarmashylyq ieleri tolyq ashylý úshin kóp jaǵdaida erkindik kerek. Belgilengen taqyryp boiynsha etiýd jazý onyń talantyna tusaý bolady. Kórmeni uiymdastyrýdaǵy basty maqsatymyz da sol, shyǵarmashylyq ielerine erkindik syilaý edi. Simpoziýmnyń uiymdastyrylýy barysynda bizge qol ushyn sozǵan jandarǵa alǵysymyz sheksiz. Oraldai ádemi qalada sýretshiler jaqsy jumys istep, shabyttanyp qaitty degen oidamyn. Jastardyń sheberlik saǵatyna qatysyp, tájiribeli sýretshilerden dáris alǵanyna qýanyshtymyn. Kóne shahardyń kórnekti jerleri, ásem tabiǵaty qylqalam sheberlerine úlken azyq boldy dep oilaimyn, - dedi joba avtory K. Japalova.
Aita ketetin jait, simpoziýmnyń bas uiymdastyrýshysy – «Batik kami» mádeni qory 2016 jyldan beri belsendi túrde jumys istep keledi. Mádeni qor shet elderge oiý-órnegimiz ben ulttyq kiimderimizdi de tanystyryp keledi. 2019 jyly AQSh-ta sýretshilerdiń ónerin álemge tanytý maqsatynda uiymdastyrylatyn «ART-Expo-New York» halyqaralyq galereiasynda úzdikter qatarynan kórinip, Shvetsiia Elshiliginiń shaqyrtýymen Stokgolm qalasynda jeke kórmesin ótkizgen.
