Búgin QR Parlamentiniń Senatynda Úkimettiń 2016 jylǵy respýblikalyq biýdjettiń atqarylýy týraly esebi tanystyryldy. Jiynda baiandama jasaǵan QR Qarjy ministri Baqyt Sultanov Úkimet holding pen ulttyq kompaniialardyń boryshtyq operatsiialaryn baqylaýda ustap otyrǵanyn aitty, dep habaralaidy Baq.kz tilshisi.
«Jalpy syrtqy borysh 163,8 mlrd dollardy qurady. Onyń 82%-ti jeke sektordyń boryshtary. Kvazimemlekettik sektordyń syrtqy boryshy 16,2 mlrd. dollar. Bul 2015 jylǵydan 2,6 mlrd. dollarǵa az. Elbasynyń Joldaýynda berilgen tapsyrmalarǵa sáikes holdingter men ulttyq kompaniialardyń boryshtyq operatsiialary Úkimet tarapynan erekshe baqylaýda bolady. Kvazimemlekettik sektordyń boryshyn azaitý úshin sýbektilerdi monitoringpen qamtý kriteriilerin anyqtaý, syrttan qaryzdardy belgilengen somadan asyra tartýǵa mindetti túrde memlekettik josparlaý jónindegi ortalyq ýákiletti organnyń kelisimi men ruqsatyn alý, kvazimemlekettik boryshty basqarý jóninde úilestirý keńesin qurý siiaqty sharalar kózdelip otyr», - dedi baiandamasynda Qarjy ministri.
Sondai-aq, Sultanovtyń aitýynsha, 2016 jyly biýdjettik baǵdarlamalar sany 247 bolyp, 2015 jylǵa qaraǵanda 2 esege azaidy. Qysqartý «bir strategiialyq maqsat – bir biýdjettik baǵdarlama» printsipi boiynsha júzege asty. Bul memlekettik organdarǵa qarajatty igerý kezinde derbestik berý úshin jasaldy. Mysaly, ákimshilerdiń biýdjettiń atqarylýy barysynda kishi baǵdarlamalar arasynda qarajatty qaita bólýge quqyǵy bar.
«Qarajatty naqty ekonomikaǵa neǵurlym tez, ári tiimdi jetkizý úshin biýdjet salasyndaǵy ákimshilik kedergilerdi ary qarai azaitý qarastyrylyp jatyr», - dep túiindedi Baqyt Sultanov.
