Premer-Ministr Asqar Mamin jańa QR Mádeniet jáne sport ministri Aqtoty Raiymqulovany, sondai-aq jańadan qurylǵan QR Saýda jáne integratsiia ministrliginiń basshysy Baqyt Sultanovty, QR Ekologiia, geologiia jáne tabiǵi resýrstar ministrliginiń basshysy Maǵzum Myrzaǵalievti ujymǵa tanystyrdy. Bul týraly Ministrler kabinetiniń baspasóz qyzmetinen málim etti, dep habarlaidy "Ult aqparat".
Úkimet basshysy Arystanbek Muhamediulyna mádeniet, sport, týrizm salalarynyń damýyna qosqan úlesi úshin alǵys bildirdi.
«Arystanbek Muhamediuly - tájiribesi mol basshy. Ministr qyzmetinde bes jyl ishinde qarqyndy jumys istep, osy salanyń ózekti máselelerin sheshýge qatysty nátijeli jumystardy atqardy», - dedi Asqar Mamin.
Óz kezeginde, A. Muhamediuly QR Tuńǵysh Prezidenti - Elbasy Nursultan Nazarbaevqa jáne Memleket basshysy Qasym-Jomart Toqaevqa atalmysh salany damytýdyń memlekettik baǵdarlamalaryn iske asyrýdaǵy ózine artylǵan senim men kórsetken qoldaýlaryna alǵysyn jetkizdi.
Asqar Mamin QR Mádeniet jáne sport ministrliginiń ujymyna jańa basshyny tanystyrý barysynda Aqtoty Raiymqulovanyń atalǵan saladaǵy joǵary biliktiligin atap ótti. Sondai-aq vedomstvo aldyna qoiylǵan maqsattarǵa qol jetkizýde tabys tiledi.
A. Raiymqulova Mádeniet jáne sport ministrliginiń qurylymynda 6 jylǵa jýyq ýaqyt jumys istep keledi. 2016 jylǵy qazannan bastap vitse-ministr qyzmetin atqardy.
Asqar Mamin jańa QR Saýda jáne integratsiia ministrliginiń ujymymen kezdesýde Baqyt Sultanovtyń basshylyq qyzmetterdegi kópjyldyq jumys tájiribesin atap ótti.
«B. Sultanovtyń jańa memlekettik organnyń jumysyn uiymdastyrýǵa jáne qoiylǵan mindetterdi sapaly oryndaýǵa qajetti mol tájiribesi bar», - dedi A. Mamin.
QR Premer-Ministri onyń Memleket basshysynyń úlken senimin aqtap, jańa ministrliktiń aldynda turǵan mańyzdy mindetterdiń sapaly oryndalýyn qamtamasyz etetinine senim bildirdi.
Sondai-aq Úkimet basshysy Ekologiia, geologiia jáne tabiǵi resýrstar ministri Maǵzum Myrzaǵalievti tanystyra otyryp, onyń joǵary biliktiligi men jumys tájiribesin atap ótti.
«Prezident Sizge, óte mańyzdy baǵytty basqarýdy jáne jańa memlekettik organnyń jumysyn uiymdastyryp, qoiylǵan mindetterdi oryndaýdy senip tapsyrdy», - dep atap ótken Asqar Mamin, barlyq uiymdastyrý máselelerin jedel sheshýdi jáne jumysqa kirisýdi tapsyrdy.
