QR Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeev bazarǵa qanshalyqty jii baratynyn aitty, dep habarlaidy QazAqparat.
Ortalyq kommýnikatsiialar qyzmetinde ótken brifingte BAQ ókilderi qos ministrden bazar-dúkenderge qanshalyqty jii bas suǵatynyn surady.
«Árine, otbasyly adam bolǵandyqtan úiimizde azyq-túlik qaýipsizdigin qamtamasyz etýimiz kerek. Demalys kúnderi ýaqytym bolǵanda dúkenge, bazarǵa baramyn. Ár otbasynyń óz aspazdyq ustanym-qalaýy bolady. Mysaly, palaý pisirý úshin qymbatyraq et alý kerek bolady degendei. Árine, azyq-túlikti ózimiz satyp alamyz jáne baǵalardyń shamasyn bilemiz. Azyq-túlik sebetiniń baǵasy týraly aitsaq, sózsiz, ol ósti. Oǵan infliatsiia dálel. Azyq-túlik baǵasy ósip jatqanyn kórip júrmin», - dedi Baqyt Sultanov.
Al Erbol Qarashókeev otbasyna qajetti azyq-túlikti birge baryp alýǵa qoly tie bermeitinin aitty.
«Ókinishke qarai, jubaiymmen, januiammen birge azyq-túlik satyp alýǵa baratyn ýaqytym joq. Biraq aiyna bir nemese eki ret jeksenbi saiyn otbasymmen azyq-túlik satyp alýǵa tyrysam. Jalǵyz aita ketetin dúnie, biz árdaiym tek Qazaqstanda óndirilgen ónimderdi ǵana alamyz. Baǵanyń aitarlyqtai óskeni seziledi. Biraq byltyrǵa qaraǵanda kartop, sábiz siiaqty kókónisterdiń baǵasy turaqty boldy. Ministrlik qabyldaǵan sharalardyń arqasynda bul ónimderge bailanysty dúrbeleń bolǵan joq», - dedi vedomstvo basshysy.
Buǵan deiin Úkimettiń keńeitilgen otyrysynda Memleket basshysy Qasym-Jomart Toqaev qant tapshylyǵyn rettei almaǵan Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeevke sógis jariialaǵan edi.
