Qarjy ministri Baqyt Sultanov eseptik kezdesý aiasynda Qazaqstanda kriptovaliýta engizý múmkindigine qatysty túsinikteme berdi, dep habarlaidy "Ult aqparat" Baq.kz portalyna silteme jasap.
«Halyqaralyq kriptovaliýta qurý, árine, kúrdeli másele. Ol, eń aldymen, birqatar eldiń qarjy júieleriniń ózara árekettestigin qajet etedi. Máselen, Eýraziialyq ekonomikalyq odaq aiasynda. Aqsha-nesie saiasaty men tólem júielerin úilestirý máselesi álsin-álsin kóterilip keledi, biraq oǵan daiyndyq kerek», - deidi qarjy ministri.
Sultanovtyń aitýynsha, jalpyálemdik aýqymda bul máseleniń túp-tamyry – halyqaralyq qarjy júiesiniń turaqtylyǵynda.
«Ókinishke qarai, 2008 jyldan beri biz túrli daǵdarysty bastan keshirip kelemiz. Munyń barlyǵynyń negizinde qarjy júiesiniń jetilmegendigi jatyr. Kriptovaliýtalar, olardyń osy merzim ishindegi turaqty ósimi álem nazaryn aýdartyp otyrǵany belgili. Onyń ústine, búginde barlyq salanyń tsifrlandyrylýy qarqyndy júrip jatyr. Bul ózgeris qarjy sektoryna da áserin tigizedi, sol sebepti bizdiń aldymyzdaǵy mindet – halyqaralyq valiýtalardyń qaýipsizdigi men turaqtylyǵyn qamtamasyz etý», - dep atap ótti Sultanov.
Ministrdiń pikirinshe, búginde qoldanystaǵy valiýtalar daǵdarys jyldary kóptegen problemaǵa tótep bere almaǵan.
«Meniń oiymsha, bul máseleni jan-jaqty saralap, talqylaý qajet. Naqty Qazaqstan týraly aitar bolsaq, biz qazir munaiǵa táýeldilikten qutylýdyń jolyn izdep jatyrmyz. Munai baǵasynyń bir kishkene qubylýy kórshi elder men bizdiń valiýtaǵa qalai áser etip jatqanyn sizder de kórip otyrsyzdar. Ekonomikany ártaraptandyrý, ekonomikanyń turaqty ósimin qalyptastyrý boiynsha mindetterdi esepke alsaq, árine, mundai valiýta qurý senimdi ári turaqty ósim úshin qosymsha alǵyshart bolýy múmkin», - dep túiindedi vedomstvo basshysy.
