Alashordanyń 100 jyldyǵyna arnalǵan halyqaralyq ǵylymi-tájiribelik konferentsiiada «Alash jáne derbestik muratynyń jalǵastyǵy» atty baiandama jasaǵan QR Parlament Májilisiniń depýtaty Qýanysh Sultanov elimizdegi memlekettik tildiń damymai otyrýynyń sebebin aitty, dep habarlaidy Baq.kz aqparat agenttigi.
«Biz búgin HH ǵasyrdyń basynda ult bostandyǵy men aǵartýshylyq múddesine birikken Alash úkimetiniń qairatkerleriniń rýhyna taǵzym etip, olardyń ideialary men armandaryn saraptap, búgingimizdi baǵalap, erteńimizdi aiqyndaý úshin pikir qosýǵa jinaldyq. Elbasynyń quttyqtaýynyń ár sózine kóp maǵyna syiyp tur. Nursultan Ábishuly táýelsizdigimizdiń alǵashqy kezeńinen bastap, ulttyq memleket jáne onyń táýelsizdik ideiasyn tereń zerttep, zerdeleýdiń mańyzdylyǵyna nazar aýdardy. Jańa dáýirdegi memleketimizdiń qatań da qaiyrymsyz básekelestikke qabiletti bolýyn, qaishylyqty jahandyq qubylystarǵa jutylyp ketpei, jaǵada qalyp qoimai, órkendeýge ilese alsaq qana ultymyz máńgi el bolaryna airyqsha ekpin berip keledi», - deidi depýtat óz baiandamasynda.
Sonymen qatar ol Alash kósemderiniń Keńes úkimetimen terezesi teń Qazaq avtonomiiasy deńgeiinde kelissózder jasai otyryp, Táýelsiz memleket qurý ideiasyn júzege asyrýǵa tyrysqanyn aitty.
«Alaida kelisim de, senim de uzaqqa barmady. Alash úkimeti úsh jylǵa jýyq merzimde taratylyp, Alash qairatkerlerin, olardyń áýletin, otbasy múshelerin uzaq merzimge sozylǵan qýǵyndaý – bolshevikter úkimetiniń qanquily tásiline ainaldy. Alash úkimetiniń ideiasyn jaryqqa shyǵaryp, tárkilengen tarihymyzdy qalpyna keltirý múmkindigi 1991 jyly ǵana týdy», - deidi ol.
Keshegi tarih pen búgingi kelbetti salystyrǵan depýtat bolashaqqa qadam basý úshin eki kezeńdi ushtastyrǵanda ǵana utatynymyzdy eskertti.
«Osy 25 jylda alashtanýshylar salasy quryldy. Alash tarihyna bailanysty myńdaǵan maqalalar, zertteýler jaryq kórdi. Bul da Táýelsizdiktiń jarqyraǵan kórinisi. Táýelsizdik, bostandyq, teń quqyqtyq, jasampazdyq bizdiń zamannan urpaqqa qaldyrar - asyl mura, amanat. Ókinishke qarai, biz áli kúnge memlekettiń táýelsizdik ideiasyn jarnama deńgeiinde ǵana paidalanyp, onyń ishki mazmunyna tereń boilai almai jatyrmyz. Beiqamdyǵymyz basym. Táýelsizdik aldyq, endigári osylai tura beredi degen oi kóp. Osy máselelerdi qozǵap, Elbasy halyqtyń sanasyna qozǵaý túsirgen sol maqalasynyń (Rýhani jańǵyrý - avt) negizgi maqsaty da osyny eskertý, ár qazaqtyń sanasyna jetkizý. Jas urpaq sanasyna elin, ultyn, ana tilin, Otanyn súiýge tárbieleýdi saiasi nasihat dep túsinemiz. Otanshyldyq týraly áńgimeni saiasat dep qabyldaimyz», -deidi ol.
Sonymen qatar Qýanysh Sultanuly búgingi tańda memlekettik tildi mensinbeitinderdiń kóbeigenin aitty.
«Óz aldymyzǵa memleket bolyp, óz tilimizge memlekettik til dep mártebe berip, qazaq mektepterin kóbeitip, JOO qazaq tilindegi mánderdi tiimdi etýge pármen berip turǵan dáýirde úlkeni bar, kishisi bar áli kúnge kóp otandastarymyzdyń qazaq tilinde sóilemei, sóilegisi kelmei júrgeni ulttyq sananyń tómendigi der edim. Keide til máselesine bireý kináli, bilik pen úkimet kináli dep jatady. Buǵan árbir azamattyń ózi jaýapty ekenin túsiner jaǵdaiǵa jete alǵanymyz joq. Alash ideiasyn zertteýde alashtanýshylar men ǵalymdar, búkil qoǵam bolyp, ulttyq tilimizdiń mártebesin kóterýimiz kerek», - deidi depýtat.
