Týystaryn asa qatygezdikpen óltirdi dep aiyptalǵan Sultan Sársemalievke qatysty sot protsesinde jańa jaittar jariia boldy. Is dáleldemelerdi zertteý kezeńine ótip, sot otyrysynda tergeý barysynda túsirilgen beinematerialdar kórsetildi, dep habarlaidy ult.kz.
Kadrlarda 2025 jyldyń jeltoqsanynda joǵalyp ketken erli-zaiypty Maksot Qarabalin men Nasip Óteshqalievanyń máiitteri tabylǵan sát beinelengen. Tergeý dereginshe, olardyń deneleri jeke úi aýlasyndaǵy qora ishinde shamamen 1,3 metr tereńdikke kómilgen. Qabirdiń ústi linoleýmmen jabylǵany anyqtalǵan.
Beinejazbada tergeýshiler aldymen otaǵasynyń, keiin onyń astynan jubaiynyń máiitin shyǵarǵany kórsetildi. Buǵan deiin politsiia, Ulttyq ulan jáne arnaiy tehnika jumyldyrylǵan izdeý jumystary nátije bermegen. Jasyryn jerleý orny tek 2026 jylǵy 9 naýryzda tergeý eksperimenti barysynda anyqtalǵan.
Sot zalynda kórsetilgen kadrlar marqumdardyń týystaryna aýyr áser etti. Al aiyptalýshy Sultan Sársemaliev beinematerialdardy únsiz baqylap otyrǵan.
Sotta kúdiktiniń Atyraýdaǵy «Dina» bazaryndaǵy lombardqa barǵan sáti de jariia etildi. Baqylaý kameralarynan onyń zergerlik buiymdar salynǵan qyzyl qorapshany ótkizip, keiin aqsha alyp shyqqany kórinedi. Tergeý bul áshekeiler qaza tapqan otbasynyń úiinen alynǵan bolýy múmkin dep esepteidi.
Sondai-aq aiyptalýshy men onyń jubaiy Aqbaian Muqanǵalievanyń Qazaqstannan ketý joly da kórsetildi. Tergeý málimetine sáikes, olar 2025 jylǵy 9 jeltoqsanda «Qaplanbek» ótkizý beketi arqyly Ózbekstanǵa ótip, keiin Tashkentten Kýala-Lýmpýr arqyly Indoneziianyń Bali aralyna barǵan.
Erli-zaiypty birneshe ai boiy Indoneziiada bolǵanymen, 2026 jylǵy 24 aqpanda vizalyq rejimdi buzǵany úshin jergilikti kóshi-qon qyzmetiniń qolyna túsken. Keiin olar Qazaqstanǵa deportatsiialanyp, quqyq qorǵaý organdaryna tapsyrylǵan.
