Úkimet otyrysynda Ulttyq ekonomika ministri Timýr Súleimenov áleýmettik mańyzy bar azyq-túlikterdiń nege qymbattaǵanyn túsindirdi, dep habarlaidy Baq.kz.
Ministrdiń aitýynsha, ótken aptamen salystyrǵanda atalǵan azyq-túlikterdiń baǵasy 0,2%-ke ósipti. Al jyldyń basynan bastap baǵalardyń joǵarylaýy 1,9%-ti quraǵan.
«Qant, qyryqqabat, kúrish, taýyq etine baǵalardyń ósýi baiqalady. Azyq-túlik baǵalarynyń negizgi ósý sebepteri Eýraziialyq ekonomikalyq odaqtyń naryǵynda ónimderdiń qymbattaýy men taýarlardyń ózindik quny quramyndaǵy ústeme shyǵystardyń ósýimen bailanysty», - dedi Timýr Súleimenov.
Sondai-aq ministr árbir taýardyń baǵasy ne sebepti óskenine jeke-jeke toqtaldy.
«Qazaqstandyq qanttyń eleýli bóligi importtyq shiki qanttan óndiriledi. Birinshi kezekte Resei Federatsiiasy naryǵyndaǵy jaǵdaimen bailanysty. Osy jyldyń 9 aiynda qyryqqabat eksporty ulǵaiyp, 18,6 myń tonnany qurady. Osyǵan bailanysty qyryqqabattyń baǵasy basqa kókónistermen salystyrǵanda aitarlyqtai ósti. Maýsymdyq shyǵyndarǵa bailanysty qyryqqabattyń baǵasy aldaǵy ýaqytta da ósýi múmkin», - dedi ol.
Súleimenovtyń aitýynsha, kúrish baǵasynyń qymbattaýy janar-jaǵarmai materialdary men kommýnaldyq shyǵystar baǵalarynyń kóterilýimen bailanysty eken.
«Taýyq etine baǵanyń ósýi qus etiniń shamamen 50% AQSh-tan importtalatynymen bailanysty. AQSh dollary baǵamanyń ósýine bailanysty importtalatyn taýyq eti de qymbattady», - dep túiindedi sózin ministr.
