Parlament Májilisiniń depýtaty Záýresh Amanjolova Prezident Joldaýynda aitylǵandai, sýitsid keseline qarsy kúreske tiisti salanyń barlyǵy jumylýy kerektigin aityp ótti, dep habarlaidy QazAqparat.
«Memleket basshysynyń búgingi Joldaýy birshama áleýmettik máselelerdi qamtydy. Zeinetkerlik, meditsina, bilim, mádeniet salasynyń ózekti problemalary qaýzaldy. Prezident meditsina jaily aita kele salaýatty ómir saltyn saqtaýǵa barynsha mańyz berip otyr. Barsha halyqty buqaralyq sportpen ainalysýǵa shaqyrdy. 2020 jyldan bastap elimiz mindetti áleýmettik meditsinalyq saqtandyrý júiesine kóshkeli otyr. Oǵan qajetti qarajat bólingen. Endigi mindet – osy qarajatty tiimdi paidalanyp, meditsina sapasyn arttyrý. Osy arqyly meditsinalyq qyzmettiń qoljetimdiligin arttyrǵan abzal. Joǵary tehnologiialy meditsinany halyqqa jetkizý de óte ózekti», - dedi Záýresh Amanjolova Parlamenttiń birlesken otyrysynan keiin tilshilerdiń saýaldaryna jaýap bere otyryp.
Májilis depýtaty sonymen birge Prezident jasóspirimder arasyndaǵy sýitsidke toqtalǵanyn da eske saldy.
«Memleket basshysy sol úshin jekelegen memlekettik baǵdarlama jasalýy kerektigin aityp ótti. Sebebi, sýitsidke tek meditsina ǵana jaýapty emes. Sondyqtan oǵan jan-jaqty salalar bir kisidei atsalysýy kerek. Onyń ishinde pedagogika salasy, bilim men mádeniet, sondai-aq ishki ister ministrligi, ata-analar, otbasylar osy keselge qarsy jumylýy tiis. Iaǵni, otbasynyń mártebesin, institýtyn qoldaý arqyly bul qoǵamnyń qaýipti keselimen kúresýge bolady», - dedi ol.
Eske sala ketsek, Prezident Qasym-Jomart Toqaev Qazaqstan halqyna Joldaýynda jasóspirimder arasyndaǵy sýitsidtiń kóbeiýine alańdaýshylyq bildirgen bolatyn.
«Otbasy institýtyn qoldaý, inkliýzivti qoǵam qurý, balalardyń quqyǵyn qorǵaý, turmystyq zorlyqqa qarsy kúresý – jumysymyzdyń basym baǵyttarynyń biri bolýy kerek. Jasóspirimder arasyndaǵy sýitsidtiń kóbeiýi bizdi alańdatýy tiis. Zorlyq-zombylyqtan zardap shekken balalardy ońaltýǵa arnalǵan baǵdarlamany ázirleýimiz kerek», - dedi Memleket basshysy.
