پارلامەنت مەجٸلٸسٸنٸڭ دەپۋتاتى زەۋرەش امانجولوۆا پرەزيدەنت جولداۋىندا ايتىلعانداي, سۋيتسيد كەسەلٸنە قارسى كٷرەسكە تيٸستٸ سالانىڭ بارلىعى جۇمىلۋى كەرەكتٸگٸن ايتىپ ٶتتٸ, دەپ حابارلايدى قازاقپارات.
«مەملەكەت باسشىسىنىڭ بٷگٸنگٸ جولداۋى بٸرشاما ەلەۋمەتتٸك مەسەلەلەردٸ قامتىدى. زەينەتكەرلٸك, مەديتسينا, بٸلٸم, مەدەنيەت سالاسىنىڭ ٶزەكتٸ پروبلەمالارى قاۋزالدى. پرەزيدەنت مەديتسينا جايلى ايتا كەلە سالاۋاتتى ٶمٸر سالتىن ساقتاۋعا بارىنشا ماڭىز بەرٸپ وتىر. بارشا حالىقتى بۇقارالىق سپورتپەن اينالىسۋعا شاقىردى. 2020 جىلدان باستاپ ەلٸمٸز مٸندەتتٸ ەلەۋمەتتٸك مەديتسينالىق ساقتاندىرۋ جٷيەسٸنە كٶشكەلٸ وتىر. وعان قاجەتتٸ قاراجات بٶلٸنگەن. ەندٸگٸ مٸندەت – وسى قاراجاتتى تيٸمدٸ پايدالانىپ, مەديتسينا ساپاسىن ارتتىرۋ. وسى ارقىلى مەديتسينالىق قىزمەتتٸڭ قولجەتٸمدٸلٸگٸن ارتتىرعان ابزال. جوعارى تەحنولوگييالى مەديتسينانى حالىققا جەتكٸزۋ دە ٶتە ٶزەكتٸ», - دەدٸ زەۋرەش امانجولوۆا پارلامەنتتٸڭ بٸرلەسكەن وتىرىسىنان كەيٸن تٸلشٸلەردٸڭ ساۋالدارىنا جاۋاپ بەرە وتىرىپ.
مەجٸلٸس دەپۋتاتى سونىمەن بٸرگە پرەزيدەنت جاسٶسپٸرٸمدەر اراسىنداعى سۋيتسيدكە توقتالعانىن دا ەسكە سالدى.
«مەملەكەت باسشىسى سول ٷشٸن جەكەلەگەن مەملەكەتتٸك باعدارلاما جاسالۋى كەرەكتٸگٸن ايتىپ ٶتتٸ. سەبەبٸ, سۋيتسيدكە تەك مەديتسينا عانا جاۋاپتى ەمەس. سوندىقتان وعان جان-جاقتى سالالار بٸر كٸسٸدەي اتسالىسۋى كەرەك. ونىڭ ٸشٸندە پەداگوگيكا سالاسى, بٸلٸم مەن مەدەنيەت, سونداي-اق ٸشكٸ ٸستەر مينيسترلٸگٸ, اتا-انالار, وتباسىلار وسى كەسەلگە قارسى جۇمىلۋى تيٸس. ياعني, وتباسىنىڭ مەرتەبەسٸن, ينستيتۋتىن قولداۋ ارقىلى بۇل قوعامنىڭ قاۋٸپتٸ كەسەلٸمەن كٷرەسۋگە بولادى», - دەدٸ ول.
ەسكە سالا كەتسەك, پرەزيدەنت قاسىم-جومارت توقاەۆ قازاقستان حالقىنا جولداۋىندا جاسٶسپٸرٸمدەر اراسىنداعى سۋيتسيدتٸڭ كٶبەيۋٸنە الاڭداۋشىلىق بٸلدٸرگەن بولاتىن.
«وتباسى ينستيتۋتىن قولداۋ, ينكليۋزيۆتٸ قوعام قۇرۋ, بالالاردىڭ قۇقىعىن قورعاۋ, تۇرمىستىق زورلىققا قارسى كٷرەسۋ – جۇمىسىمىزدىڭ باسىم باعىتتارىنىڭ بٸرٸ بولۋى كەرەك. جاسٶسپٸرٸمدەر اراسىنداعى سۋيتسيدتٸڭ كٶبەيۋٸ بٸزدٸ الاڭداتۋى تيٸس. زورلىق-زومبىلىقتان زارداپ شەككەن بالالاردى وڭالتۋعا ارنالعان باعدارلامانى ەزٸرلەۋٸمٸز كەرەك», - دەدٸ مەملەكەت باسشىسى.
