Qazaqstannyń iri kompaniialary men biznesmenderi Túrkistan qalasyna bir-bir nysannan salyp beredi. Memleket basshysy Nursultan Nazarbaev árbir basshyǵa jeke-jeke tapsyrma berdi, dep habarlaidy Sputnik Qazaqstan Túrkistan oblysy ákiminiń baspasóz qyzmetine silteme jasap.
Qazaqstan prezidenti Nursultan Nazarbaev ótken aptada Túrkistanǵa jasaǵan sapary barysynda Túrkistan oblysynyń áleýmettik-ekonomikalyq damý máseleleri jóninde keńes ótkizdi. Jiynda Elbasy ministrler men úkimet múshelerine, elimizdegi alpaýyt kompaniialardyń basshylaryna Túrkistan qalasyna bir-bir nysan salý jóninde tapsyrma berdi.
Baspasóz qyzmetiniń málimetinshe, prezident árbir basshyny ornynan turǵyzyp, jeke-jeke sóilesken. Nazarbaev memleket tarapynan kásipkerlerge únemi qoldaý kórsetilgenin, endi olar da eldiń damýyna úles qosýy kerektigin basa aitqan.
Memleket basshysy Túrkistan qalasyna qandai nysandar qajet ekenin tizip, iri kompaniialarǵa naqty mindet júktedi.
Máselen, Elbasy "Bazis-A" kompaniiasynyń basshysy Aleksandr Belovichke "Sizder sporttyq jáne mádeni nysandardy jaqsy salyp júrsizder. Bul jerge teatr kerek. Oǵan qaýqaryńyz jetedi dep esepteimin. Túrkistanǵa ádemi, ámbebap teatr salý qajet" dedi. Biznesmen tapsyrmany oryndaýǵa ýáde berdi. Al ENRC basshylarynyń biri, ataqty milliarder Patoh Shodievke Túrkistanda álemdik deńgeidegi Túrki halyqtarynyń mýzeiin salyp berýdi tapsyrdy.
Sonymen qatar, "QazMunaiGaz" UK basqarma tóraǵasy Saýat Myńbaevty halyqaralyq talapqa sai úlken stadion salýǵa mindettedi. Aidyn Raqymbaev basqaratyn "BI Group" kompaniiasy qazaq handary men bileriniń, batyrlarynyń ortalyǵyn ashyp berse, "Haivill Qazaqstan" kompaniiasy turǵyn úi keshenin salýǵa kirispek.
"Qazaqstan temirjoly" UK jastar saraiyn qolǵa alsa, "KEGOC" Qoja Axmet Iasaýidiń shaǵyn mýzeiin turǵyzady. Sondai-aq "Qazposhta" AQ Túrkistanda zaman talabyna sai pochta bólimshesi men tsifrlyq keńse salady.
Al "Qazaqtelekom" Smart texnologiialaryn engizedi. Kásipker Daniiar Abylǵazin sý sporty keshenin salýǵa ýáde berse, Nurlan Smaǵulov kólik salonyn ashyp bermek.
"Qazatomónerkásip" UAK" AQ Túrkistanǵa qarjylai qoldaý kórsetse, túrkiialyq kompaniialar da Túrkistandy damytýǵa úles qosatynyn bildirdi. Jiyn barysynda kásipkerler men iri kompaniialar Túrkistanǵa aýrýhana, týrizm kolledjin tartý etetinin jetkizdi.
"Memleket basshysy árbir nysandy qaǵazǵa muqiiat belgilep, ony salý mindeti kimge tapsyrylǵanyn jazyp alyp otyrdy. Oblys ákimdigi men kompaniialar arasynda kelisimder bekitildi", — delingen habarlamada.
Sonymen qatar Nursultan Nazarbaev qala halqynyń kóbeiýi men týristerdiń kóptep kelýine bailanysty Túrkistan qalasynyń temirjol vokzalyn rekonstrýktsiialaý, onyń ótkizý múmkindigin ulǵaitý, sondai-aq áýejai salý jáne áýe qatynastaryn qamtamasyz etý máselelerin qarastyrýdy tapsyrdy.
"Túrkistandy zamanaýi tehnologiialardy qoldana otyryp, tól mádenietimizge sai qaita jańǵyrtý kerek. Sondai-aq, Túrkistandy damytý qoryn da qurǵan durys. Kim qoldaý jasaýǵa daiyn, sol aqshany aýdarsyn. "Kóz — qorqaq, qol — batyr" demekshi, osynyń bárin bir-eki jylda bitiretin bolsaq, Túrkistan jainap shyǵa keledi", — dedi Prezident.
