Sýdianyń jańa róli sheneýnikterdiń minez-qulqyn tártipke salady. Bul týraly QR Joǵarǵy soty Mamandyrylǵan sot alqasynyń tóraǵasy Aigúl Qydyrbaeva málim etti, dep habarlaidy QazAqparat tilshisi.
«Azamattar sotqa ádil sheshim izdep keledi. Alaida sýdia azamattyq protseste taraptardyń ustanymymen shekteledi, bul oǵan is boiynsha «obektivti shyndyqty» anyqtaýǵa múmkindik bermeidi. Ákimshilik protsestiń basty ereksheligi - sýdianyń belsendi róli. Osy qaǵidany basshylyqqa ala otyryp, sot mindetti túrde ákimshilik organnyń sheshimin tekserýge; eger taraptar usynǵan dáleldemeler jetkiliksiz bolsa, istiń barlyq mán-jaiyn zertteýge; talap-aryzda jiberilgen formaldy qatelerdi joiýǵa; talap-aryzdyń mazmunyn tolyq anyqtap onyń saldaryn túsindirýge; is boiynsha aldyn ala pikir aitýǵa mindetti», - dep túsindirdi A. Qydyrbaeva Parlament Májilisinde Ákimshilik rásimdik-protsestik kodeks jobasynyń tanystyrylymy barysynda.
Osy oraida ol daýdy sotta qaraý kezinde ákimshilik organnyń «kinálilik prezýmptsiiasy» bekitiledi. Dáleldeý aýyrtpalyǵy sheshim qabyldaǵan organǵa júkteletin bolady.
«Sýdianyń jańa róli sheneýnikterdiń minez-qulqyn tártipke salady, azamattardyń quqyqtaryn qorǵaý úshin qolaily jaǵdai jasaidy», - dedi Aigúl Qydyrbaeva.
