Dúisenbi kúni keshkisin sýdia Emi Konei Barret AQSh joǵarǵy sotynyń jańa múshesi retinde ant berdi. Aq úide ótken rásimnen birneshe saǵat buryn senat tyńdaýynda onyń kandidatýrasy maquldanǵan edi.
Ant berý rásiminde sóilegen prezident Donald Tramp "búgin Amerika úshin, Konstitýtsiia men zań ústemdigi úshin mańyzdy kún" dep málimdedi.
Barret kandidatýrasyna 52 senator qoldap daýys bergen, 48-i qarsy bolǵan. Senator-demokrattardyń barlyǵy jáne respýblikashyl senator Siýzan Kollins qarsy daýys bergen. Joǵarǵy sotqa múshe retinde usynylǵan kandidatty bir jarym ǵasyr ishinde alǵash ret senattaǵy azshylyq sanalatyn partiia ókilderi qoldamai otyr.
Prezident sailaýyna birneshe apta qalǵanda Donald Tramptyń 48 jastaǵy Emi Konei kandidatýrasyn joǵarǵy sot múshesine usynýyn demokrattar ótkir synaǵan. Olardyń pikirinshe, joǵarǵy sottyń jańa múshesin aldaǵy ýaqytta sailanatyn prezident taǵaiyndaýy tiis. Al respýblikashyldar zańǵa sáikes áreket etip otyrǵanyn aityp, syndy qabyldamaǵan.
Sýdia Barret joǵarǵy sottaǵy konservativtik kózqarastaǵy sýdialar sanyn (9 sýdianyń altaýy) tolyqtyryp otyr. Bul áielderdiń abort jasaý quqyǵy, meditsinalyq saqtandyrý salasyndaǵy reforma siiaqty eń mańyzdy máseleler boiynsha shyǵarylatyn sot sheshimderine áser etýi yqtimal degen qaýip bar. 3 qarashada ótetin prezident sailaýynan keiin de sottar sailaýǵa bailanysty shaǵymdardy qaraýy múmkin.
Senattyń zań komitetiniń jetekshisi Lindsi Grem senattyń "tarihi sheshim" qabyldaǵanyn atap ótken. Al senator-demokrat Elizabet Ýorren senattaǵy daýys berýdi "zańsyz" dep atap, ony "túńilgen partiianyń sońǵy demi" dep ataǵan.
Konservativtik kózqarastaǵy sýdialardy taǵaiyndaý - Donald Tramptyń sailaý aldynda bergen ýádeleriniń biri bolǵan. Emi Konei Barret - Donald Tramp taǵaiyndaǵan joǵarǵy sottyń úshinshi múshesi. Respýblikashyldar sailaýǵa bir apta qalǵanda konservator sýdiany bekitý konservativtik elektorattyń qoldaýyna ie bolýǵa múmkindik beredi dep úmittenedi.
