Sýbsidiialaýdyń qoldanystaǵy júiesi iri agroqurylymdardyń igiligi úshin jumys isteitini baiqalady. Bul týraly Senattaǵy parlamenttik tyńdaýda depýtat Muhtar Jumaǵaziev aitty, dep habarlaidy QazAqparat.
«Memleket basshysy Joldaýda atap ótkendei, agrarlyq sektordy sýbsidiialaý tetikteri qaita qaraýdy jáne turaqtandyrýdy talap etedi. Sýbsidiialardy resimdeý tártibi túsinikti ári ashyq, shaǵyn jáne orta, sonyń ishinde jeke qosalqy sharýashylyqtarǵa qoljetimdi bolýy tiis. Alaida, shaǵyn sharýashylyqtar barlyq aýyl sharýashylyǵy óniminiń 70%-yn óndiretine qaramastan, sýbsidiialaýdyń qoldanystaǵy júiesi iri agroqurylymdardyń igiligi úshin jumys isteitini baiqalady», - dedi M. Jumaǵaziev «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Joǵaryda aitylǵan asa ózekti máselelerge bailanysty myna usynystar jasaldy:
- Menshik nysanyna qaramastan aýyl sharýashylyǵy taýaryn óndirýshiler men jeke qosalqy sharýashylyqtardy qoldanystaǵy sýbsidiialaýdyń negizgi tetikterine qosý;
- Aldaǵy ýaqytta sýbsidiialaýdan arzan jáne uzaq merzimdi kreditteýge birtindep kóshý máselesin qarastyrý;
- Ár óńir boiynsha tabiǵi-klimattyq erekshelikterine qarai saralanǵan sýbsidiialaýdy engizý;
- Aýyl sharýashylyǵy taýaryn óndirýshilerdiń sýbsidiialardy paidalaný tiimdiligin baǵalaý tetigin jetildirý.
«Qazirgi ýaqytta Senat komiteti birqatar zań jobasyna bastamashylyq etý boiynsha jumys júrgizýde. Máselen, «Organikalyq ónim óndirý jáne onyń ainalymy týraly» zań jobasy osy saladaǵy zańnamany jetildirý, halyqaralyq standarttarǵa sáikes keltirý maqsatynda ázirlendi. «Qazaqstan Respýblikasynyń keibir zańnamalyq aktilerine jaiylymdardy paidalaný máseleleri boiynsha ózgerister men tolyqtyrýlar engizý týraly» zań jobasy jaiylym resýrstaryn basqarýdyń institýtsionaldyq jáne ekonomikalyq negizderin jetildirýge baǵyttalǵan», - dedi depýtat.
