Úkimet otyrysynda premer-ministri Oljas Bektenov aýyl sharýashylyǵy salasyndaǵy birqatar máselege toqtalyp, olardy tezirek sheshýdi tapsyrdy.
Ol byltyr qolaisyz aýa raiy astyqtyń sapasy men kólemine aitarlyqtai kesirin tigizgenin atap ótti. Sózinshe, kóptegen zardaptyń aldyn alyp, onyń saldaryn barynsha azaitýǵa bolar edi.
"Egis alqaptarynyń qurylymynan dándi-daqyldardy ártaraptandyrý qarqyny tómen ekenin baiqaýǵa bolady. Ákimdikterdiń tarapynan bul baǵytta belsendi jumys kórinbeidi. Diqandar óńirlerdiń naqty josparlary men salalyq ministrliktiń mindetterinen beihabar. Onyń ústine, eginshilerdiń arasynda sýdy kóp qajet etetin daqyldardyń egis alqaptaryn ádeii azaityp kórsetý faktileri de kezdesedi", – dep shúilikti premer.
Bektenovtiń sózinshe, aýyl sharýashylyǵy tehnikasynyń tozǵany da ótkir problema kúiinde qalyp otyr.
"Qazirgi tańda jalpy tehnika parkiniń shamamen 75%-dan astamynyń tozyǵy jetken. Bul másele de tiisti sheshimdi talap etedi. Diqandardyń jańa tehnikany satyp alýyn jeńildetip, sybailas jemqorlyq táýekelderin azaitý qajet", – dep tapsyrma berdi ol.
Onyń ústine fermerler ózderine tiesili sýbsidiialardyń tym keshigip tólenetinine narazylyq bildirgen kórinedi. Ótken jylǵy sýbsidiialar boiynsha qaryz 160 mlrd teńgeden asyp ketken.
"Jeńildikti dizel otynyn úlestirý barysy da erekshe baqylaýda bolýǵa tiis. Alypsatarlyqqa jáne qoldan tapshylyq jasaýǵa jol bermeý kerek", – dep naqtylady premer-minstr.
