Agrarlyq saladaǵy oqý oryndarynda bilim berý baǵdarlamalaryn jańartý mańyzdy. Búgin Senattaǵy parlamenttik tyńdaýda Aýyl sharýashylyǵy ministri Erbol Qarashókeev osylai aitty, dep habarlaidy QazAqparat.
«Agrarlyq ǵylymnyń jáne aýyl sharýashylyǵy úshin kadrlar daiarlaýdyń jai-kúii jetildirýdi qajet etedi. Otandyq ǵalymdardyń ǵylymi ázirlemelerin óndiriske engizýde jáne olardy kommertsiialandyrýda kemistikter az emes. Sondai-aq bilimdi taratýdyń naqty júiesin qalyptasyrýymyz qajet. Oqý oryndaryndaǵy bilim berý baǵdarlamalaryn jańartý mańyzdy», - dedi E. Qarashókeev «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Onyń aitýynsha, salany memlekettik qoldaý máselelerinde de eleýli kemshilikter bar. Eń aldymen, bul sýbsidiialaý tetikteriniń kúrdeliligi, sýbsidiia alýdyń sharttarynyń kóptigi. Sonymen qatar sýbsidiialar negizinen iri biznes sýbektilerine jáne de tehnologiialyq protsesterdi qoldaýǵa baǵyttalǵan.
«Osyndai olqylyqtar men naqty indikativtik kórsetkishterdiń bolmaýy, sondai-aq sýbsidiia alýshylardyń jaýapkershilikteriniń joqtyǵy jemqorlyqqa jol ashyp otyrǵany búgingi kúni barshaǵa málim», - dedi ministr.
