QR Ishki ister vitse-ministri Iýrii Ilinniń aitýynsha, búginde respýblika boiynsha 1156 úi sýdyń astynda qaldy. Sonyń ishinde saiajailar da bar. Jalpy, 4715 adam qaýipsiz jerge kóshirildi, dep xabarlaidy QazAqparat tilshisi.
Atap aitqanda, Aqmola oblysynda - 1340 adam, Shyǵys Qazaqstan oblysynda - 52, Jambyl oblysynda - 55, Qaraǵandy oblysynda - 1850, Qostanai oblysynda - 200, Aqtóbe oblysynda - 1174, al Soltústik Qazaqstan oblysynda 44 adam qaýipsiz jerge kóshirilgen bolatyn. Ol adamdardyń bir bóligi evakýatsiialyq beketterde ornalassa, qalǵandary týǵan-týystarynda turyp jatyr. Osy ýaqytqa deiin 900 adam óz úilerine oraldy.
«Búginde Qaraǵandy, Aqmola, Soltústik Qazaqstan men Aqtóbe oblystarynda sý tasqyny qatty bolyp tur. Atalǵan aimaqtarda jergilikti atqarýshy organdar men politsiia qyzmetkerleri kezekshilik atqaryp keledi. Tótenshe jaǵdailar komiteti óz tarapynan patrýl jasaýǵa qajetti arnaiy júzý quraldaryn usyndy. Sondyqtan sýdyń astynda qalǵan úilerde eshqandai urlyq-qarlyqqa jol berilmeidi», - dedi Ilin búgin Astanadaǵy Ortalyq kommýnikatsiialar qyzmetinde ótken baspasóz máslixatynda.
Aita keteiik, búgingi baspasóz máslixatynda vitse-ministr bir aptanyń ishinde Jabai ózenindegi sýdyń deńgeii tómendeitinin jetkizdi. Sondai-aq ol ministr Qalmuxambet Qasymovtyń Atbasar kentindegi sý toǵanynyń buzylýyna bailanysty qylmystyq isti qozǵaýdy tapsyrǵanyn málimdedi. Al Qaraǵandy oblysynda aldaǵy on kúnde sý tasqynynyń beti qaitady degen boljam bar. Vitse-ministrdiń aitýynsha, Qazgidromet biylǵy sý tasqynyn durys boljai almady.
