Elimizde sý tasqanyna qarsy 45 poiyz jasaqtalyp jatyr. Bul týraly búgin Úkimet otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Poezdardyń úzdiksiz jáne qaýipsiz qozǵalysyn qamtamasyz etý, joldardy, ǵimarattardy ýaqtyly daiyndaý maqsatynda «Qazaqstan temir joly» ulttyq kompaniiasynyń buiryǵy bekitilgen. Onda sý tasqyny kezinde jol qaýipsizdigin, joldyń jáne ǵimarattardyń turaqty jumysyn qamtamasyz etýdiń uiymdastyrý-tehnikalyq is-sharalary qarastyrylǵan. Aýmaqtyq uiymdarmen birlesip, sý qoimalarynyń jaiy, agrotehnikalyq dambalar tekserilýde. Sondai-aq, kúrdeli jaǵdai týyndaǵan jaǵdaida tótenshe jaǵdailar jónindegi oblystyq qurylymdarymen ózara áreket etý jumystary júrgizilýde», - dedi ol.
Ministrdiń aitýynsha, ótken jyldardyń taldaýyna sáikes, tasqyn sýlardy ótkizý boiynsha barlyq aýmaqtarda 673 qaýipti jerdiń tizimi anyqtalǵan. Sý tasyǵan kezde táýlik boiy jaýapty tulǵalardyń kezekshiligi uiymdastyrylady. Olar qaýipti jerlerdi ainalyp, qosymsha tekserip shyǵady.
«Kópirlerdiń, qubyrlardyń, drenajdy qudyqtardyń tesikterin qardan tazalaý, taýdy jáne sý burǵysh aryqtardy, naýalardy jáne kiývetterdi ashý boiynsha daiyndyq jumysy bastaldy. Kesek tastar, relsti paketter, standartty emes temirbeton shpaldar tielgen sý tasqanyna qarsy 45 poiyz jasaqtalyp jatyr», - dedi Beibit Atamqulov.
