Foto: Ashyq derekkóz
Sý resýrstaryn basqarý júiesin damytýdyń 2024-2030 jyldarǵa arnalǵan josparyna sý tasqynyna qarsy is-sharalar engiziledi. Bul týraly sý resýrstary jáne irrigatsiia ministri Nurjan Nurjigitov málimdedi, dep habarlaidy ministrliktiń baspasóz qyzmeti.
Prezidentten qatań sógis alǵan ministr sý tasqynyna qarsy is-sharalar jónindegi keńes ótkizdi. Oǵan sý sharýashylyǵy komitetiniń tóraǵasy jáne ministrlik departamentteriniń direktorlary, sondai-aq "Qazsýshar" RMK óńirlik filialdarynyń jáne basseindik inspektsiialardyń basshylary qatysty. Nurjigitov sý tasqynyna qarsy kúres jáne apattyń aldyn alý boiynsha birqatar tapsyrmalar berdi.
"Aqpan aiynda Sý resýrstaryn basqarý júiesin damytýdyń 2024-2030 jyldarǵa arnalǵan tujyrymdamasy bekitildi, ony iske asyrýdyń keshendi jospary bar. Erigen qar sýyn aýyl sharýashylyǵynda paidalaný josparyn shuǵyl ázirleý qajet. Sý tasqyny kezeńi aiaqtalǵannan keiin barlyq sý qoimalary 100% tolýy kerek, biraq sý jinaý kezeńi sý sharýashylyǵy qurylystaryna ziian keltirmeitindei ótýi kerek",– dedi Nurjigitov.
Onyń aitýynsha, ministrlik pen jergilikti atqarýshy organdar arasyndaǵy ózara jedel is-qimyldyń mańyzdylyǵy zor. Óitkeni ministrlikten bólek, ákimdikterdiń balansyna kiretin sý qoimalary da bar.
Aita keteri, 30 naýryzda Aqordada ótken shuǵyl otyrysta prezident Qasym-Jomart Toqaev birqatar laýazymdy tulǵalarǵa qatań sógis jariialady. Olardyń ishinde sý resýrstary jáne irrigatsiia ministri Nurjan Nurjigitov te bar. Budan bólek, 1 sáýirde ótken jiynda úkimet bekitken Sý resýrstaryn basqarý júiesin damytýdyń 2030 jylǵa deiingi tujyrymdamasyn synǵa aldy.
Toqaevtyń oiynsha, tujyrymdamany júzege asyrý jónindegi is-qimyl jospary deklarativtik sipatqa ie. Qujat sý tasqyny saldarynan bolatyn shyǵynnyń aldyn alý jáne azaitý máselesin keshendi túrde sheshýge múmkindik bermeidi. Al ministrlikter jaýapkershilikten qashyp, bir-birine siltep otyrady.
