Sý qubyryn senimgerlik basqarýǵa berý múmkindigin qarastyrý qajet. Bul týraly búgin Úkimet otyrysynda Premer-Ministr Álihan Smaiylov aitty, dep habarlaidy QazAqparat.
«Eldi mekenderdi sapaly aýyz sýmen qamtamasyz etý – aldymyzda turǵan eń mańyzdy mindetterdiń biri. 2025 jyldyń sońyna deiin halyqtyń 100 paiyzy taza aýyz sýmen qamtylýy tiis. Bul – áleýmettik mańyzy joǵary másele. Sondyqtan, ákimdikter aýyldar men qalalarda tiisti infraqurylymdy tartý jumystaryna erekshe mán berýi tiis. Atalǵan jobalardy qarjylandyrýǵa basymdyq berilý kerek. Qoldanystaǵy jáne jańadan iske qosylatyn nysandardy tiimdi paidalaný úshin salany avtomattandyrý kerek. Iaǵni, innovatsiialyq tehnologiialardy engizýge erekshe mán bergen durys. Oblys ákimderi sý qubyrlaryn kútip ustap, olardy tiisti mekemelerge senimgerlik basqarýǵa berý múmkindigin qarastyrý qajet», - dedi Úkimet basshysy.
Onyń atap ótýinshe, ákimdikter aýyl ishinde júrgizilip jatqan sý qubyrlary men eldi mekenge deiin tartylatyn toptyq sý qubyrlarynyń josparyn bir-birine sáikestendirýi tiis.
«Keibir toptyq sý ótkizgishterdiń qurylysy jyldar boiy aiaqtalmai jatqany jasyryn emes. Degenmen, qazir jaǵdai birshama jaqsaryp keledi. Qurylysy uzaqqa sozylǵan 10 jobanyń qazir 7-eýi paidalanýǵa berildi. Qalǵan 3 joba biyl iske qosylady. Mundai problemalardyń oryn alýynyń basty sebebi - negizinen jobalyq qujattamalardyń sapasyz daiyndalýy», - dedi ol.
Premer-Ministr sonyń kesirinen joba quny birneshe ese qymbattap ketedi de tapsyrys berýshiler men merdiger kompaniialar arasynda kelispeýshilik oryn alatyndyǵyn basa aitty.
«Munyń barlyǵy jergilikti bilik tarapynan úilestirý jumystarynyń álsizdiginen. Jańa jobalardy iske asyrý kezinde osy jaittardyń barlyǵyn eskerip, tapsyrma ýaqytynda oryndalýy qajet. Atalǵan problemalarǵa qaramastan, jalpy, halyqty sýmen qamtamasyz etý jumystary jaqsy qarqynmen júrip jatyr» - dedi Álihan Smaiylov.
