Sý basý qaýpi tónip turǵan respýblikalyq mańyzǵa ie joldardyń 400-den astam ýchaskesi erekshe baqylaýǵa alyndy. Bul týraly "Ult aqparat" Indýstriia jáne infraqurylymdyq damý ministrligine silteme jasap habarlaidy.
«Sý basý qaýpin ýaqytyly aldyn alý jáne joiý maqsatynda QR IIDM avtomobil joldaryn kóktemgi sý tasqyny kezeńine daiyndaý sharalaryn júrgizip jatyr. Qazirgi tańda Avtomobil joldary komitetiniń baqylaýyna sý basý qaýpi tónip turǵan 464 jol ýchaskesi, 66 kópir men 852 sý ótkizgish qubyr alynǵan», - delingen habarlamada.
Osy oraida jol qyzmetteri táýlik boiy kezekshilik uiymdastyryp, avtojoldar men jol qurylystaryna kún saiyn patrýldeý júrgizedi. Sý tasqyny kezeńinde jumystardy ýaqytyly uiymdastyrý úshin janar-jaǵar maidyń 644 tonnasy, qumnyń 8,1 myń, tastyń 6,8 myń, qiyrshyq tastyń 17,2 myń tekshe metri, 45,5 myń dana qap, 25 dana temir-betondy qubyr daiyndaldy. Jalpy daiyndyq 90 paiyzdy qurady. Sý ótkizgish qubyrlardy jáne kópir arnalaryn qardan tazalaý jumystary bastalyp ketti. Sý basý qaýpi tónip turǵan nysandarda jol-paidalaný tehnikasynyń 883 birligi bekitilgen.
Eske salaiyq, ótken jylǵy sý tasqyny kezeńinde respýblikalyq mańyzy bar avtomobil joldarynyń qozǵalys bóligi sý astynda qalýynyń 38 oqiǵasy tirkelgen bolatyn. Mundai oqiǵalardyń sany boiynsha Qaraǵandy oblysy kósh bastady. Óńirdegi joldardyń sý astynda qalýy boiynsha 26 oqiǵa tirkelgen edi. Aqmola oblysynda jol ýchaskelerin sý basýdyń 7, Shyǵys Qazaqstan men Pavlodar oblystarynda – 2, Soltústik Qazaqstan oblysynda – 1 oqiǵasy oryn alǵan. Osynyń saldarynan jol jiekteri, jasandy qurylystar shamaly buzylǵan bolatyn. Keltirilgen zalaldyń jalpy somasy 90,3 mln teńgeni qurady. Sý tasqyny saldarynan bolǵan olqylyqtardy jol qyzmetteri der kezinde joidy.
