Sý tasqyny qaýpi bar óńirlerde avtojoldarda kúndelikti patrýldeý júrgizilip jatyr. Bul týraly QR Indýstriia jáne infraqurylymdyq damý ministri Qaiyrbek Óskenbaev aitty, dep habarlaidy QazAqparat.
«Avtomobil jáne temir joldardaǵy sý tasqyny qaýpiniń aldyn alý ári joiý maqsatynda ministrlik ýaqtyly jáne qajetti sharalar qabyldaýda. Táýlik boiy kezekshilik uiymdastyrylyp, avtojoldar men jol qurylystaryn kúndelikti patrýldeý júrgizilip jatyr. Baqylaýda 278 qaýipti ýchaske, 52 kópir jáne 478 sý ótkizý qubyry bar, olarda 700- den astam jol-paidalaný tehnikasy bekitilgen», - dedi Q. Óskenbaev Senattyń jalpy otyrysynda.
Onyń aitýynsha, sý tasqynyna qarsy jumystardy uiymdastyrý úshin materialdardyń qajetti kólemi daiyndaldy.
Jalpy, sý tasqyny kezeńinen beri erigen qar sýynyń joldyń júrý bóliginen asyp ketýiniń 30 jaǵdaiy tirkeldi.
«Temirjoldar boiynsha toqtalsaq, poiyzdardyń úzdiksiz jáne qaýipsiz qozǵalysyn, joldy, jasandy qurylystardy ýaqtyly daiyndaýdy qamtamasyz etý maqsatynda «Qazaqstan temir joly» Ulttyq kompaniiasy tiisti buiryǵyn bekitti. Onda sý tasqyny kezeńinde jol men jasandy qurylystardyń saqtalýy men turaqty jumysyn qamtamasyz etýge baǵyttalǵan uiymdastyrýshylyq-tehnikalyq is-sharalar kózdelgen. Tasqyn sýlardy ótkizý boiynsha ótken jyldardyń tájiribesin taldaýdan barlyq óńirler boiynsha 673 qaýipti orynnyń (qubyrlar, kópirler, jerjol) tizbesi aiqyndaldy», - dedi ministr.
