Foto:baq.kz
Oqý jylynyń aiaqtalýyna sanaýly kúnder qaldy. Biyl mektepke deiingi, orta bilim, tehnikalyq jáne kásiptik bilim oshaqtarynda 5 millionnan astam bala oqyǵan eken. Bul Qazaqstan halqynyń tórtten bir bóligi.
Ádette elimizde osy 5 million balanyń bilimine jii ózgeris engizip, tájiribe kóp jasalyp jatady. Mysaly, byltyr Oqý-aǵartý Ministriniń buiryǵymen oqý jyly mamyrdyń sońyna deiin jalǵasqan. Al biyl ol jańashyldyq alynyp tastalyp, burynǵysha 25 mamyr elimizdiń barlyq mektepterinde sabaq aiaqtalmaq. Jii bolatyn ózgeristerge jurtshylyq narazy bolyp jatady. Desede, ózgeristerdiń jaǵymdy tustaryn da kórsetip jatqandar bar.
Biylǵy oqý jylyndaǵy ózgerister
Biylǵy jyly alǵash ret bilim alýshylardyń baǵdarlamalar mazmunyn meńgerýin baǵalaý maqsatynda 5-8, 10 synyptar aralyǵynda qazaq tili men ádebieti pánderinen aralyq emtihandar ótkiziledi. Bul týraly Oqý-aǵartý birinshi vitse-ministri Natalia Jumadildaeva aitty.
«Biyl bastaýysh synyp oqýshylary mamyr aiynyń sońǵy kúnderinen dástúrli túrde jazǵy demalysqa shyǵady. Al 5-11 synyp oqýshylaryna 27 mamyrdan bastap emtihandar ótkiziletin bolady. Emtihandar aiaqtalǵan soń olar da jazǵy demalysqa shyǵady», -dedi vitse-ministr Ortalyq Kommýnikatsiialar Qyzmetinde ótken baspasóz otyrysynda.
Biylǵy oqý jylynyń taǵy bir jańalyǵy mektepterde saltanatty sońǵy qońyraý sharasy tek qana bitirýshi synyptarǵa ǵana ótkiziletini, al basqa synyptar tek synyp saǵatymen shekteletini habarlanǵan. Oqý jylyn qorytyndylaý attestatsiialary da jyldaǵydai 9-11 synyptar úshin bolmaidy. Attestatqa jyldyq qorytyndy baǵalar qoiylady.
«Mektepterde «Bilimim otanyma» atty synyp saǵatynyń ótýiniń maqsaty jyldyq qorytyndy jasaý. Bala jáne synyp osy jyly bilim alýda qandai jetistikke jetti, sony anyqtaý. Al mektep bitirýshilerge keler bolsaq, olar mektep qabyrǵasyn bitirip ketkesin qońyraý olar úshin qaityp estimeitin bolady. Qazir meniń jasymdaǵy adam úirenip qalǵan klassikalyq qońyraý úni qazirgi mektepterde joq. Qazir qońyraýdyń ornyna qazaqtyń kúii oinaidy. Bitirýshilerge keler bolsaq, mektep aldynda 70 adam turǵanda mektep bitirý keshi 11 synyp oqýshylary úshin maǵynasyn joǵaltady. Ministrimiz Ǵani Bektaiuly shynymen de estelikterge, jylýǵa toly bolatyn, balalar bir aýditoriiaǵa jinala alatyn sońǵy qońyraýdyń jańa formatyn naqty anyqtaýdy usynyp otyr. Biz bitirýshilerge sońǵy qońyraý keshin ótkizý formatyn ózderińiz oilap tabyńyzdar dep otyrmyz», -dedi Natalia Jumadildaeva .
Oqý-aǵartý vitse-ministri Edil Ospan: biylǵy jaz maýsymynda mektep oqýshylarynyń 92%-y demalys jáne bos ýaqytyn uiymdastyrý sharalarymen qamtylady dep jaz maýsymyna daiyndyqtar erekshe baqylaýda ekenin málimdedi.
Sonymen qatar vitse-ministrdiń sózinshe balalardyń bos ýaqytyn uiymdastyrý olardy eńbekpen, týristik, shyǵarmashylyq, intellektýldyq, halyqaralyq is-sharalarmen qamtý baǵytynda júrgiziledi jáne respýblika kóleminde 81,1%-y quraidy.
Mektepter qashan internetke qol jetkizedi?
Qazaqstanda mektepterdi internetpen qamtamasyz etý máselesi ózekti bolyp kele jatqany belgili. Ásirese pantemiia kezinde eldegi tsifrlandyrýdyń aqsaǵan tustary erekshe baiqaldy. Quziretti mekeme basshylarynyń sózinshe «Qoljetimdi Internet» ulttyq jobasy aiasynda 2027 jylǵa deiin 2066 mektepke talshyqty-optikalyq bailanys jelisin tartý josparlanǵan.
Topan sý basqan aimaqta balalar qalai UBT tapsyrady?«Búginde Starlink tehnologiiasy pilottyq jobasy sheńberinde 1993 mektep joǵary jyldamdyqty internetke qosylatyn bolady. Búgingi tańda 624 (31%) mektep Starlink jerseriktik internetine qosyldy», -deidi Oqý-aǵartý vitse-ministri Arai Orazova .
Aita keteiik, elimizdiń 14 aimaǵy úshin negizgi UBT bastaldy, testileý 5 shildege deiin jalǵasady. Al, tótenshe jaǵdai rejimi jariialanǵan 6 óńirde, atap ótsem Aqmola, Aqtóbe, Atyraý, Batys Qazaqstan, Qostanai, Soltústik Qazaqstan oblystarynda tirkelý ýaqyty 20 mamyrǵa deiin uzartyldy, UBT 25 mamyr men 12 shilde aralyǵynda ótkiziledi.
«Sý tasqyny bolǵant 6 aimaqqa ministr tarapynan arnaiy granttar bólinedi. Tótenshe jaǵdai oryn alǵan aimaqtaǵy balalar úshin UBT tapsyrýda jeńildik jasaý týraly depýtattardyń da usynystary boldy. Aimaq basshylarynyń ózderi sý tasqyny bolǵan óńirlerdegi halyqpen kezdesip, oqytýshylar men oqýshylarmen kezdesip, sondai sheshim qabyldady», -dedi Ulttyq testileý ortalyǵynyń direktory Bolatbek Ábdrasylov.
