Foto ©️ Tengrinews.kz / Týrar Kazangapov
Ónerkásip jáne qurylys ministri Qanat Sharlapaev sý tasqyny saldarynan búlingen qora-qopsy memleket qarjysy esebinen qalpyna keltirilmeitinin aitty, - dep habarlaidy «Ult aqparat» Tengrinews.kz -ke silteme jasap.
Úkimet otyrysynda ministr sý tasqynynan keiin turǵyn úilerdi qalpyna keltirý boiynsha qandai sharalar qabyldanǵanyn túsindirdi.
"Turǵyn úi jaramsyz dep tanylǵan jaǵdaida eki mehanizm bar. Ákimdiktiń sheshimi boiynsha, osy óńirde páter satyp alynady - jábirlenýshimen kelisilgen tańdaý boiynsha. Nemese bul turǵyn úidi qaita salamyz. Iaǵni, turǵyn úimen qamtamasyz etýdiń eki tetigin úkimet resmi túrde qabyldady", - dedi Sharlapaev.
Onyń aitýynsha, qazir tasqynnan zardap shekkenderge 100 AEK (369 200 teńge, 1 AEK – 3 692 teńge) ótemaqy berilgen.
"Biraq aýlany, qoralardy jáne taǵy basqasyn qaita turǵyzbaimyz. Sebebi basty maqsatymyz - halyqty baspanamen qamtamasyz etý", - dedi Qanat Sharlapaev Úkimettiń otyrysynan soń.
Onyń pikirinshe, biýdjet qarjysy oryndy jumsalýy kerek.
"Ýaqytsha qurylystardy qaita turǵyzýdyń keregi bar ma, joq pa? Bizdiń pikirimizshe, eń aldymen halyqty baspanamen qamtamasyz etý kerek. Sondyqtan basqasyn qaita turǵyzbaimyz. Ony túsiný kerek. Sebebi, kóp adam (sý tasqyny saldarynan) úisiz qaldy. Meniń oiymsha, bizdiń az resýrsty qoraǵa, basqa máselege jumsaýǵa bolmaidy", - dedi ministr.
Buǵan deiin ónerkásip jáne qurylys ministri jańa úilerdi salýǵa bólinetin 22 million teńge eshkimniń qolyna berilmeitinin aitqan edi.
