«Aq jol» demokratiialyq partiiasy sailaýda jastardyń tańdaý erkindigin jáne adamdyq abyroiyn qorǵaýdy talap etti, dep habarlaidy QazAqparat.
«Sailaýaldy naýqan júrgizýde ákimshilik resýrsty qoldaný – bólek másele. JOO-lar men kolledjder ákimshiligi óz stýdentterin buqaralyq sharalarǵa qatysýǵa májbúrlese, daýys bergeni týraly esep talap etse, mundai oqý orny basshylary kem degende jumystan qýylýy kerek. Jastarda óz tańdaýyn jasaý múmkindigi bolýy kerek. Jastar men stýdentterdiń erkindigi men jeke kózqarasyn basyp-janshý maqsatty túrde balalardy ótirik aitýǵa jáne ózine jasalǵan zorlyqqa kónýge úiretedi. Mundai «quldardyń» býynymen ultymyz ótirik pen ózgege baǵynyshty bolý qaýpine ushyraidy», - dedi Azat Perýashev partiia quryltaiynda.
Spiker Qazaqstanǵa erkin, kúshti ári ózine senimdi jastar qajet ekenin basa aitty.
«Osydan bir ǵasyr buryn Alashtyń aiaýly aqyny Maǵjan Jumabaiuly «Men jastarǵa senemin» dep jyrlaǵan bolatyn. Al biz 100 jyl ótken soń nelikten sol jastarǵa senbeimiz? Nege olardyń óz tańdaýyna kedergi jasaimyz? «Aq jol» demokratiialyq partiiasy jastardyń tańdaý erkindigi men adamdyq abyroiyn qorǵaýdy talap etedi», - dedi A. Perýshev.
Aita keteiik, «Aq jol» demokratiialyq partiiasynyń XVI sailaýaldy quryltaiynda partiianyń sailaýaldy baǵdarlama jobasy usynyldy. Partiia tóraǵasy Azat Perýashev baǵdarlamadaǵy eń negizgi basymdyq – Táýelsizdik jáne Alash ulttyq ideiasy ekenin atap ótti.
